Friday, July 13, 2018

கலிங்கத்துப் பரணி






படைப்புக்கும் பிரம்மத்திற்கும் நடுவில்
அவள் பிரபஞ்சம்
நிலவு வானம் மலர் மாங்கனி
அவளை உங்கள் கண்களால்
பார்த்துக்கொண்டதற்கு
அவள் பொறுப்பல்ல.
அவளுடைய இன்னொரு முகம்
கொலைமுகமாக உங்களைப் பயமுறுத்துகிறது.
கழுத்தில் மண்டையோட்டு மாலையைப் போட்டு
கையில் சூலாயுதம் கொடுத்து.
நாக்கை நீட்டித் தொங்கவிட்டு..
நடுக்காட்டில் நிறுத்திவிட்டீர்கள்.
குருதியின் வாடை
நாய்களின் ஓலக்குரல்
பாலைவெளி எங்கும் அவள் வழித்தடம்
வெயிலையே நீராகக் குடித்து குடித்து
வெந்து தணிகிறது அவள் வேட்கை.
ஐம்படைத் தாலிகள் அறுபடுகின்றன.
வேல்முனையை முத்தமிடுகிறாள்.
குருதி வழியும் பீடத்தில்
ஒவ்வொரு பூக்களாக உதிர்கின்றன.
கலிங்கத்துப்  பரணியின் கதவுகளை
களிறுகள் கொண்டு உடைக்க நினைக்கிறான்
ஒட்டக்கூத்தன்.

Tuesday, July 10, 2018

ராஷி.. RAAZI .. உண்மைக்கதை..


ராஷி.. RAAZI

இந்தியாவுக்காக ஒற்று வேலைப் பார்த்த இந்தியப் பெண்ணின் 
உண்மைக்கதை.
1971 இந்திய பாகிஸ்தான் போர்க்களத்திற்கான பின்னணி ஆய்வு.
பாகிஸ்தானின் போர் நடவடிக்கைகளைக் கண்காணிக்க
பாகிஸ்தானின் இராணுவ அதிபதி வீட்டுக்கே
 திட்டமிடப்பட்டு மருமகளாக மணமுடித்து
சென்ற இந்தியப் பெண்ணின் கதை. 

ஹரிந்தர் சிக்க 2008ல் எழுதிய நாவல் “CALLING SEHMAT” . 
அந்த நாவலில் உண்மையான
அவளின் அடையாளம் புனைவுகளுக்குள் பொதிந்து 
வைக்கப்பட வேண்டும் என்பதே
பலரின் வேண்டுகோளாக இருந்தது
அப்புத்தகத்திற்கு அணிந்துரை கொடுத்த காஷ்மீரின்
பரூக் அப்துல்லா முதல் அப்பெண்ணின் முதல் காதலாக இருந்த 
அபிநவ் வரை..
(டில்லி பல்கலை கழகத்தில் அவளுடன் படித்தவர்)
அவளை அப்படியே அடையாளம் காட்டுவதை 
விரும்பவில்லை. அவள் கற்பனை அல்ல.
அவள் நிஜமாக வாழ்ந்தப் பெண்

அதுவும் சமீபத்தில் தான் இறந்துவிட்டார்.
இத்துணை பின்பிலத்துடனும் RAAZI 
திரைப்படத்தைப் பார்க்கும் போது 
ஒவ்வொரு காட்சியும் அதன் வசனங்களும்
மிகையில்லாத நடிப்பும்.. 
அதிலும் குறிப்பாக இந்திய உளவுத்துறை/இராணுவத்திற்காக 
வேவு பார்த்த கதாபாத்திரத்தில் நடித்த 
நடித்த அலிய பட், அவள் மணமுடித்த 
பாகிஸ்தானிய இராணுவ வீரன் விக்கி குஷால்..
இதில் விக்கி குஷாலின் நடிப்பும் வசனமும் கத்தி மேல் நடப்பது போல.
கொஞ்சம் பிசகினாலும்தேசத்துரோகிபட்டம் தான்
கதைக்கும் கதையைப் பார்ப்பவர்களுக்கும் கூட கிடைத்துவிடும்
 . ஆனால் கதையை நகர்த்தி சென்றிருக்கும்
விதமும் அளவான மிகவும் கவனமாக கோர்த்திருக்கும் வசனங்களும் .. 
என்னை மிகவும் கவர்ந்தவை.
பாகிஸ்தானியர்கள் என்றாலே வில்லன் வேடம்
எதிர்மறை கதாப்பாத்திரம் என்ற
ஒரு பிம்பம் கட்டமைக்கப்பட்டிருக்கிறது
அதிலும் இந்தியப்பெண் பாகிஸ்தான்
இராணுவ தளபதியின் வீட்டுக்கு போகிறாள். இராணுவ தளபதியின் மகனை
மணக்கிறாள்.. திட்டமிடப்பட்டே எல்லாம் நடக்கிறது
பாகிஸ்தானின் அவர்கள்
வீட்டில் அவள் வாழ்க்கை
அவளை அவர்கள் எதிர்கொள்ளும் மன நிலை
கணவனின்  கம்பீரம்,
 முதலிரவு என்றவுடனேயே பசித்திருக்கும் புலியைப் போல பாயாமல்
காத்திருக்கும் ஆண்மை… 
கதையின் போக்கில்  காட்டப்படும் அவனுடைய பண்பட்ட நாகரிகம்,
பெண்மையை மதிக்கும் குணம்.. 
கூட்டுக்குடும்பத்தின் பாசமும் நேசமும்..
பிரிவினைக்கு முந்திய உறவைத் தொடர
இந்திய மண்ணிலிருந்து பெண்ணைத் தேடி
மணமுடிக்கும் இராணுவதளபதி
எல்லாம் முடிந்தப் பின் … 
அவள் யார் , அவள் இந்தியாவுக்காக அங்கிருந்து செய்ததெல்லாம்
தெரிய வர அவள் தப்பித்து வரும் காட்சி
அவளை அங்கேயே முடித்துவிட நினைக்கும்
இந்திய உளவுத்துறை.. அதிலும் தப்பித்து வந்து.. 
அவள் கேட்பாள் பாருங்கள்
ஒரு கேள்வி… , 
ஏன்.. ஏன் .. இதெல்லாம் செய்றீங்க!’ 
அவள் உடைந்து அழும்போது அக்கேள்வியின் கனம்
நம்மீது பாறாங்கல்லாக இறங்கும்.
அதே நேரத்தில் அவளைக் குற்றவாளிக்கூண்டில் 
பாகிஸ்தானில் இருக்கும் அவள்
கணவர் குடும்பம்…. பாகிஸ்தானிய இராணுவதளபதி.. 
ஒரு இந்தியப் பெண்.. அதுவும்
ஒரு சின்னப்பொண்ணு.. நம்ம வீட்டுக்கே வந்து இவ்வளவும் 
செய்திருக்கா.. அவளை!”
கர்ஜிக்கும் போது.
.”அப்பா.. நாம் என்ன செய்கிறோமோ அதைத்தானே அவளும்
அவள் நாட்டுக்காக செய்தாள்என்று மெல்ல சொல்லும் அவர் மகன்
அதாவது
இந்தியப் பெண்ணின் கணவன்.
. இந்த இடத்தில் கதையும் கதைப்பாத்திரமும்
கம்பீரமாக நிமிர்ந்து நிற்கும். i respect you iqbal.
I love you Sehmat.


வெளியில் தெரியாத பலரின் கதைகளில் இதுவும் ஒன்று.
இப்படி எல்லாம் நடக்கிறது.. நடந்து கொண்டுதான் இருக்கிறது.

எனக்கும் பாகிஸ்தானில் தோழி ஒருவர் உண்டு.
அவரை நான் வங்கதேசத்தில் HOPE FOUNTATION’ ல் நடந்த
CERI conference ல் சந்தித்தேன். அதன் பின் சில காலம் தொடர்பில்
இருந்திருக்கிறேன். வங்க தேசத்தில் ஒரு ஓவியரும் முன்னாள் நீதிபதி
ஒருவரும் நண்பர்களாக இருந்தார்கள். மா நகரக்கவிதா மும்பை 
 நிகழ்வு மூலமாக அறிமுகமானோம்.
இதெல்லாம் கடந்தக் காலமாகிவிட்டது.  வேறு வழி??!


Monday, July 9, 2018

இதெல்லாம் பரீட்சையில் சகஜம் பாஸ்


136 IPS அதிகாரிகள் தேர்வு எழுதியதில் 
133 ஐபிஎஸ் அதிகாரிகள் ஃபெயில்.
மொத்தமே 3 பேர் தான் பாஸ் மார்க் எடுத்து பாஸானவர்கள்.
இந்திய காவல்துறை அதிகாரிகளுக்கான
 பயிற்சி வகுப்பு ஹைதராபாத்தில் இருக்கும்
சர்தார் வல்லபாய் படேல் நேஷனல் போலீஸ் அகடெமியில் 
நடைபெறுகிறது. 
2018ல் நடைபெற்ற தேர்வின் முடிவுகள் தான் இது.
Only three of 136 IPS officers clear exams
08 Jul 2018
133 of 136 IPS-officers fail exams, but still in service
அதுவும் 45 வாரங்கள் பாடம் சொல்லிக் கொடுத்து 
ப்ராக்டிகல் வகுப்பு நடத்தி..
ரிசல்ட் இப்படி வந்தால் என்ன செய்யமுடியும்?!
எனவே மூன்றுமுறை தேர்வு எழுதி பாஸ் செய்யலாம்
என்று சலுகை இருக்கிறது. 
3 தடவையும் எழுதி பாஸ் செய்யலைன்னா 
என்ன செய்வார்கள் என்று தெரியாது.
சரி அப்படி என்ன தான் கேள்விகேட்டு நம்ம போலீஸ்
 அதிகாரிகளைத் திணறடிக்கிறார்கள் என்று பார்த்தால்..
கேள்விகள் ..இந்தப் பாடங்களிலிருந்து தான் 
கேட்கப்படுகிறதாம். 
Indian Penal Code (IPC), Criminal Procedure Code (CrPC), 
Evidence Act and forensic science, 
and outdoor subjects like weapons,
 swimming, horse-riding and unarmed combat.
நம்ம போலீஸ் அதிகாரிகளிடம் இப்படி எல்லாம் 
அவர்களுக்கு சம்பந்தமில்லாத கேள்விகளைக் கேட்டு 
அவர்களைத் துன்புறுத்தக் கூடாது என்று 
பொதுஜனம் சார்பாக ஒரு மனு கொடுக்க வேண்டும்.

Sunday, July 8, 2018

அவள் மொழி



சொற்களை ஊடறுத்தல் யுத்தம் தான். 
அவள் அந்த போர்க்களத்தில் நிராயுதபாணியாக
ஏன் நிர்வாணமாகவும் கூட .

சக்தி மிக்கதெல்லாம் ஆண் என்றாய்.
அதுவே நன்று என்றும்
உனக்கு இனிமை தருவதெல்லாம் 
பெண் என்றாய்.
பெண் இனிமை என்றாய்.
பெண் அழகு என்றாய்.
உன் சொல்லை நம்பாதவர்களை
சிறையிலிட்டாய், தூக்கிலிட்டாய்.
அவர்கள் வாழ்ந்த அடையாளங்களை
துடைத்து எறிந்தாய்.
உன் அகராதிகள் அவளுக்கானதாக இல்லை..
உன் நுகர்வு இன்பத்தின் அடிப்படையில்
இனிமையும் அழகும் தீர்மானிக்கப்பட்டிருக்கும்
சூத்திரங்களை அவள் கண்டடைகிறாள்.
சூத்திரதாரிகளின் கட்டுமானங்களை 
அவள் உடைக்க நினைக்கிறாள்.
கிளிப்பிள்ளைகளைக் கொண்டாடும் கூட்டத்தில்
அவள் மொழி அயல்மொழியாகிறது.
அவள் தீட்டாகிறாள்.
இருளுக்குள் அவளை அடைத்துவிட 
சூரிய சந்திரர்கள் முடிவு செய்கிறார்கள்.
நட்சத்திரப் பெண்கள் அந்தப்புரத்தை
அலங்கரிக்கிறார்கள்.
போரின் வெற்றி முரசு ஒலிக்கிறது.
அவள் யுத்தங்களை வெறுக்கிறாள்.
தேச எல்லைகளைக் கடந்து விட துடிக்கிறாள்.
மொழிகளின் எல்லைகள் அவளை அகதியாக
துரத்திக் கொண்டே இருக்கின்றன.
பனிக்குடம் உடைந்து கடலின் அலைகளாய்
அவள் கரை எங்கும் ..
மணல்வெளி எங்கும் அவள் மொழியின் பிரவாகம்.
துவாரகைக் கடலில் மூழ்கிக்கொண்டே இருக்கிறது.
வெண்சங்குகள் கரைகளில் ஒதுங்குகின்றன.



Sunday, July 1, 2018

தமிழ்த்தாய் தாம்பூலம் தரிக்க வேண்டும்




இன்றைய மோசிகீரனார்கள் எவரும்
முரசுக்கட்டிலில் களைப்பு மிகுதியால்
உறங்குவதில்லை.
அவர்களிடம் சொந்தமாக அரண்மனையே இருப்பதால்
வெண்சாமரம் வீசுவதற்கு மட்டும் 
அரசர்களையே பணிக்கு அமர்த்திக் கொள்கிறார்கள்.
இவர்களின் கூட்டணியில் 
கலையும் இலக்கியமும் செழித்து செழித்து
அடர்ந்து படர்ந்து 
பல்கலை கழகத்தின் வாசலுக்கும்
பத்திரிகையின் அட்டைப்படங்களுக்கும்
அலங்காரமாகிவிடுகின்றன.
இதில் பெண்ணியம் வண்ணமயமாகவும்
ஆணியம் கறுப்பு வெள்ளையில் இருப்பதாகவும்
ஆய்வாளர்கள் குறைபட்டுக்கொள்கிறார்கள்.

புகழ்வதற்கோ கொண்டாடுவதற்கோ
காரணங்கள் தேவையில்லை
வைரமுத்து நன்றாக கிரிக்கெட் ஆடுவார் 
என்று நான் சொன்னால் 
நீங்கள் இல்லை என்றா சொல்லிவிடப் போகிறீர்கள்?!

சரி.. 

இலக்கியத்தை கொச்சைப்படுத்துகின்ற
இலக்கியத்தை விற்றுப்பிழைக்கின்ற
கலை இலக்கியத்தை
தன் அதிகாரத்தாலும் பணத்தாலும் 
விலைக்கு வாங்கி அதையும்
ஆரவாரமாகக் கொண்டாடுகின்ற
சமூகம் சீரழிந்துவிடும்.
அந்தச் சீரழிவைக் கொண்டாடும் கூட்டம்
அந்தச் சீரழிவை கேள்வி கேட்காத கூட்டம்
500 ரூபாய்க்கும் 1000 ரூபாய்க்கும்
தன்னை விற்றுப்  பிழைக்கின்ற
மானங்கெட்ட குடிகாரக் கூட்டம்
இந்தக் கூட்டத்திற்கு ஜால்ரா போடும்
அவன் இவன் அவன் சாகாக்கள் இவன் சகிகள்
தலையில் ஒளிவட்டத்தைச் சுமந்து 
திரிகின்ற பாவனையில்
சொற்களை ஒலிக்குப்பைகளாக
துப்பிக்கொண்டிருக்கிறது 
உங்கள் கூட்டம்.
எச்சிலைத் துடைத்துக் கொள்.
என் சிவகாமி தாம்பூல தட்டுடன் 
ஊஞ்சலில் ஆடுகிறாள்.
இதோசுண்ணாம்பு தடவி
நடு நரம்பை எடுத்துவிட்டாள்.
நுனியையும் காம்பையும் கிள்ளிய கையால்
சாதிக்காயை துண்டுகளாக நொறுக்குகிறாள்.
ஏலக்காயும் கொட்டைப்பாக்கும் 
அவள் தாம்பூலத்திற்குள் மறைகின்றன.
அவள் தாம்பூலம் தரிக்கிறாள்.
எச்சிலை எச்சிலால் துடைப்பாளோ
எச்சிலை நஞ்சாக்கி அழிப்பாளோ
காத்திருக்கிறது பவளபற்பங்கள்.
அவள் சக்கையைத் துப்ப தெரிந்தவள்.
வயிற்றுப்புண்ணுக்கும் செரிமானமின்மைக்கும்
தாம்பூலம் தரிப்பது நல்லது.
இலக்கியவாதிகளுக்கும் இது பொருந்தும்.
தற்காத்துக் கொள்ள
தமிழ்த்தாய் மறக்காமல்
தாம்பூலம் தரிக்க வேண்டும்.


Saturday, June 30, 2018

அந்த நான்




அந்த நான் 
இப்படித்தான் இருக்க வேண்டும் 
இதைத் தான் செய்ய வேண்டும்
இதைத்தான் பேச வேண்டும்
இப்படித்தான் உடுத்த வேண்டும்
இன்னாரிடம் தான் பழக வேண்டும்
இப்படியாக அவரவர்க்கான நான்
அவர்களை மகிழ்விக்கும் நான்
அவர்களின் பார்வையில் நான்
அந்த நான் எப்போதும் நானாகவே
இருப்பதில்லை என்பதால் தான்
அந்த நானிலிருந்து இன்னொரு நான்
எப்பொதாவது விழித்துக்கொள்கிறது.
அந்த நானை அவர்கள் 
கருக்கலைப்பு செய்ய முயற்சித்து தோற்றுப்போகிறர்கள்.
அந்த நான் அவர்களை எப்போதும்
அச்சுறுத்திக் கொண்டே இருப்பதாக
அவர்கள் நினைப்பதை
இந்த நான்இல்லைஎன்று சொல்வதில்லை.
அதனால் கடுப்பாகி அந்த நான்
காட்டேரி, பேய், பிசாசு, மோகினி
என்று அழைக்கிறார்கள்.
அடிக்கடி அவர்களே பேயோட்டும் மந்திரங்களுடன்
அந்த நானை விரட்டிவிடும் வேகத்தில்
புளியம் கம்பால் அடிக்கிறார்கள்.
அந்த நானின் கதறல் 
அவர்களின் ஆத்திரத்தை தணிக்கிறது.
கைகள் சோர்ந்து அவர்களே 
நிறுத்திக் கொள்கிறார்கள்.
நானின் காயங்கள் ஆறாமல்
சீழ்ப்பிடித்து அவர்களைச் சுற்றி
நானின் நாற்றமெடுக்கிறது.
இப்போது அவர்கள் நானை
விரட்டிவிடலாம் என்று ஒருமனதாக
தீர்மானிக்கிறார்கள்.
அந்த நான் விரட்டப்படும் போது
அவர்களும் அகதிகள் ஆகிவிடும்
அபாயம் இருப்பதை
அவர்களின் சட்டங்கள் சொல்கின்றன.
அவர்கள் இப்போது அவர்களுக்குள்
சண்டைப் போட்டுக்கொள்கிறார்கள்.
அந்த நானை யார் வெறுத்தது?
அந்த நானை யார் அடித்தது?
அந்த நான் செய்ததை எல்லாம்
யார் யார் மறந்தது?
அவர்கள் ஒருவரை ஒருவர் குற்றம்
சொல்லிக்கொண்டு 
அவர்களுக்குள் யுத்தம் நடத்துகிறார்கள்.
அந்த நான்.. நினைவுகள் தப்பிய 
அந்த நான்.. கோமாவில்
அமைதியாக படுத்திருக்கிறது.
அந்த நானின் இந்த நான்
இன்னும் உயிர்ப்புடன்
மோகினியாக காட்டேரியாக
காடுகளிலும் வீடுகளிலும்.

Wednesday, June 27, 2018

நிசப்தம்.. என்ன குற்றமா?!!


“Nishabd “.. திரைப்படம். தமிழில் சொல்வதானால்நிசப்தம்
இச்சமூகம் ஏற்றூக்கொள்ள மறுக்கும் கதை.
ஆனால் சமூகத்தில் தொடரும் கதை.
குடும்பம், கலாச்சாரம், பண்பாடு இத்தியாதி அனைத்திற்கும்
இந்த நிசப்தம் ஒரு இடி போல .. 
இந்த  நிசப்தம் .. யாருக்கும் விருப்பமில்லை.
இந்த நிசப்தம்.. ஓவ்வொருவரையும் சுற்றி 
வெவ்வேறு காலக்கட்டங்களில்
எதோ ஒரு வகையில்.. 
நிசப்தம்.. 
நிசப்தம் ஏன் வாழ்க்கையில் நுழைகிறது?
நிசப்தத்தில் ஏன் குடும்பங்கள் சிதைகின்றன.?
நிசப்தத்தில் வாழ்ந்துவிட முடியுமா?
நிசப்தம் இருப்பதை ஏன் மொழிகளின் ஓசைகள்
பேசுவதே இல்லை!
நிசப்தத்திற்கு பலியானவர்கள் பெரும்பாலும்
யாராக இருக்கிறார்கள்?
சமூகம் நிசப்தத்தைக் கண்டு ஏன் இவ்வளவு தூரம்
அச்சப்பட்டு ஓடுகிறது?
நிசப்தம்.. என்ன அவ்வளவு கொடூரமானதா?
***
நிசப்தம் அழகானது தான்.
நிசப்தம் ஒரு மவுனத்தின் கவிதை.
நிசப்தம் .. தந்தையின் அரவணைப்பை
மீட்டுத்தரும் இன்னொரு பிறவி.
நிசப்தம் .. அறிவுக்களஞ்சியத்தின் தோழமை உறவு.
நிசப்தம் .. ஓர் இனிய காதல்.
நிசப்தம் ..

***

அமிதாபச்சனின் நடிப்பும் அமித் ராயின் காமிராவும் நிசப்தத்தை
தனித்துவமாக்கி இருக்கின்றன. ராம் கோபால் வர்மா டைரக்ஷனில்
குஷியின் கதை. 
நிசப்தம் குற்றமா? 
அவர்கள் தண்டிக்கப்பட வேண்டியவர்களா?
தீர்ப்பு சொல்வதற்கு நாம் யார்?
நிசப்தம்.. தற்கொலை செய்து கொள்ளாமல்
நினைவுகளில் வாழ்ந்து கொண்டிருக்கிறது.. கதையின் முடிவு..
நிசப்தத்தின் வெற்றி. 

(2007 ல் வெளியான படம். நான் இப்போ தானே பார்த்தேன்.!)

Monday, June 25, 2018

எமர்ஜென்சி.. 43 ஆண்டுகளுக்கு முன்


எமர்ஜென்சி.. 43 ஆண்டுகள்

25 ஜூன் 1975 அன்றைய இந்திய பிரதமர் இந்திராகாந்தி 
எமெர்ஜென்சி - அறிவித்த நாள்.
அகில இந்திய வானொலியில் இந்திராகாந்திஇந்தியக்குடியரசு 
தலைவர் எமர்ஜென்சியை அறிவிக்கிறார். பொதுமக்கள் பதட்டமடைய தேவையில்லை" என்றார்.
"The President has declared a state of Emergency. 
There is no need to panic)
ஜெயபிரகாஷ் நாராயணன், மொரார்ஜி தேசாய், வாஜ்பாயி
எல் கே அத்வானி, அசோக் மேத்தாஇன்னும் பலர் 
சிறையில் அடைக்கப்பட்டார்கள். 
ஆனாலும் எமெர்ஜென்சியில் இச்செய்தியை
இந்தியாவில் வாசிக்க முடியவில்லை.
. வழக்கம்போல பிபிசி தான் இச்செய்தியை முதன் முதலில்
ஜூன் 26, காலை 7.30 மணிக்கு அறிவித்தது.

எமெர்ஜென்சி ஏன் அறிவித்தார் என்பதைக் குறித்து
இன்று பலர் கருத்து சொல்லிக்கொண்டிருக்கிறார்கள்.
குஜராத்தில் எழுந்த மாணவர்களின் எழுச்சியும் போராட்டமும்,
பீகாரில் ஜெயபிரகாஷ் நாராயணனின் இயக்கம்,
14 இலட்சம் இரயிலே தொழிலாளர்களைத் தன் கட்டுப்பாட்டுக்குள்
வைத்து ஜார்ஜ் பெர்னாண்டஸ் நடத்திக் காட்டிய புகழ்பெற்ற
இரயில்வே நிறுத்தம், ராவ் பெரேலி தேர்தலில் இந்திராகாந்தியின்
வெற்றியை எதிர்த்து தொடுக்கப்பட்ட வழக்கு..இறுதியாக
இந்திராகாந்திக்கு கோபமூட்டிய அன்றைய இரவு ராம்லீலா மைதானத்தில் நடந்தக் கூட்டம்..
 மொரார்ஜிதேசாயும் ஜெயபிரகாஷ் நாராயணனும் பேசிய
பேச்சு..

At this rally, JP gave a call to army 
and police not to follow the orders of 
Indira Gandhi government…..The police, army 
and the people were asked to follow the 
Constitution than Indira Gandhi.

மேற்கு வங்க முதல்வர் சித்தார்த் ஷங்கர் ராயிடம் தான்
முதன் முதலாக இது குறித்து பேசினார் இந்திரா.
 அவருடைய அமைச்சர்கள் யாரிடமும் இது பற்றி ஆலோசிக்கவில்லை!
அமைச்சர்களுடன் கலந்தாலோசிக்க நேரமில்லை என்று
குடியரசு தலைவரிடம் சொல்லிவிடலாம் என்று
 இருவரும் சேர்ந்து முடிவு செய்கிறார்கள்
இந்திராவின் வானொலி உரையை எழுதி முடித்து 
இந்திராவின் வீட்டை விட்டு வெளியில்
வரும்போது அதிகாலை 4 மணியைக் கடந்துவிட்டது.
ராய் அவர்களை இந்திரா காந்தி வீட்டு வாசலில் 
சந்திக்கும் ஓம் மேத்தா அவர்கள்
.. “..பத்திரிகைகளுக்கு மின்சாரம்
வழங்குவதை தடை செய்தல், நீதிமன்றங்களை மூடுதல்..
என்ன இது?”
இதெல்லாம் எங்கள் திட்டத்தில் இல்லை என்று 
ராய் பதில் சொல்கிறார்.. மீண்டும் இந்திராவை சந்திக்க காத்திருக்கிறார் ராய்.
 ஓம் மேத்தா தான் அறிந்த தகவலை அவரிடம் சொல்கிறார்.
பத்திரிகைகளை தணிக்கை செய்வது இந்திராவின் விருப்பம். ஆனால், பத்திரிகை நிறுவனங்களுக்கு மின்சாரம் துண்டிப்பது, நீதிமன்றங்களை மூடுவது போன்றவை சஞ்சய் காந்தியின் திட்டம்’.  என்று போட்டு உடைக்கிறார்.
மறு நாள் காலை 6 மணிக்கு அமைச்சரவையைக் கூட்டுகிறார் இந்திரா.
அவர்களுக்கு கூட்டத்தை அறிவித்தது காலை 5 மணிக்கு !
9 அமைச்சர்கள் டில்லியில் இல்லை. 8 அமைச்சர்களும் 5 இணை
அமைச்சர்களும் கலந்து கொண்ட கூட்டம். இந்திராகாந்தியின் அமைச்சரவைக்கு
எமெர்ஜென்சி அறிவிக்கப்பட்டதை இந்திராகாந்தி சொல்கிறார்.
எந்த அமைச்சரும் வாயைத் திறக்கவே இல்லை.!!
ஒரே ஒரு அமைச்சர் மட்டும் மெல்லிய குரலில் கேட்ட கேள்வி
அந்த அறையின் மயான அமைதியைக் குலைத்தது.
பாதுகாப்பு அமைச்சர் ஸ்வரண் சிங் கேட்டார் 
'அவர்கள் எந்த சட்டத்தின்கீழ் கைது செய்யப்பட்டார்கள்?' 
 என்று.
வேறு எந்தக் கேள்வியும் கேட்கப்படாமல் இந்தியாவில்
இந்திராகாந்தியின் அமைச்சரவைக் கூட்டம் எமர்ஜென்சியை
ஏற்றுக்கொண்டது என்று தான் சொல்ல வேண்டும்.
அதன் பின்.. இந்திராவையும் நெருக்கடி நிலை பிரகடனத்தையும்
பற்றிய விமர்சனங்கள் அவர் வாழும் காலத்திலேயே வந்தன.
அவருடைய மறுமொழி .. அவருடைய மொழியில்..
When I implied the Emergency Not Even a Dog breached

எமெர்ஜென்சி பத்திரிகைகளை ஊமையாக்கியது.
ஊடகங்கள் அனைத்தும் தணிக்கைக்கு உள்ளாகின.
எனக்குத் தெரிந்து இந்தியன் எக்ஸ்பிரஸ் தன் ஆசிரியர் 
பக்கத்தை எதுவும் அச்சிடமால் வெள்ளைத்தாளாக
வெளியிட்டது. இன்னொரு பத்திரிகை தாகூரின்
கவிதை வரிகளை
 "Where the mind is without fear, 
and the head is held high”
அச்சிட்டு வெளியிட்டது. 
பின்னணிப்பாடகர் கிஷோர்குமாரின் பாடல்களை
வானொலியிலோ தொலைக்காட்சியிலோ ஒலி ஒளி பரப்ப
தடை செய்யப்பட்டிருந்தது !
Kissa Kursi Ka  - 1977

இந்தி திரைப்படம்.. இந்திரா காந்தியின் எமெர்ஜென்சியை பற்றியது.


தமிழ் நாட்டில் அன்று நடந்தது என்ன?
திமுக தலைவர்கள் கைது செய்யப்பட்டார்கள்.
திமுக தான் ஜார்ஜ் பெர்னாண்டஸ்க்கு அடைக்கலம் கொடுத்து
சென்னையில் தலைமறைவாக வைத்திருந்ததாக சொல்கிறார்கள்

கலை இலக்கிய துறையில் நெருக்கடி நிலை
குறித்து எவ்வித சலனமும்
தமிழகத்தில் இருந்ததாக தெரியவில்லை. 
(அப்படி எதாவது குறிப்பிட்டு சொல்லும் படியாக 
இருந்தால் சொல்லுங்கள் )

இந்திராவின் 20 அம்ச திட்டங்கள் ஏற்கனவே தமிழ் நாட்டில் 
செயல்படுத்தப்பட்டு கொண்டு இருப்பதாக
கலைஞர் கடிதம் எழுதினார். ஆனாலும் லும்1976 ஜனவரி 31 திமுக வின் பதவிக்காலம் முடிவதற்கு 6 வாரங்களுக்கு முன்பே திமுக அரசு கலைக்கப்பட்டது.
அதன் பின் நிகழ்ந்த சில சுவையான சம்பவங்கள் 
முரசொலி செய்திகள்
மிகவும் முக்கியமானவை. அதிலும் குறிப்பாக 
குடும்பவிழாக்கள் புதிது புதிதாக
வரிசையாக உருவாக்கப்பட்டன
ஆம் ஏற்கனவே திருமணம் செய்து கொண்டவர்கள் 
மீண்டும் திருமணம் செய்வதும் 
ஏற்கனவே கட்டிய பழைய வீட்டுக்கு
வெள்ளை அடித்து புதுமனை புகுவிழா நடத்துவதும்
அந்த விழாக்களில் கலைஞர் கலந்து கொள்வதுமாக
 திமுக வின் செயல்பாடுகள் இருந்ததை
நான் கேள்விப்பட்டிருக்கிறேன். 
ஆனால் அதே கலைஞர் 1980 ல்  
சென்னை கடற்கரையில் அன்னை இந்திரா காந்தியை  மேடையில் வைத்துக் கொண்டு,.
 நேருவின் மகளே  வருகே... நிலையான ஆட்சி தருகஎன்றும் சொன்னது
மறந்துவிடவில்லை.
மிக முக்கியமான இன்னொரு செய்தி
எமர்ஜென்சிக்கு பெருமை சேர்த்த செய்தி
இந்தியாவில் எமர்ஜென்சி காலத்தில் இரயில்கள் பேருந்துகள்
எல்லாம் தாமதமின்றி சரியான நேரத்தில் ஓடிக்கொண்டிருந்தனவாம்!