Monday, April 24, 2017

தமிழ் இலெமுரியா

Image result for தமிழ் இலெமுரியா இதழ்

தமிழ் இலெமுரியா விடைபெறுகிறது..
இனி இதழ் வரப்போவதில்லை
மும்பையிலிருந்து வெளிவந்துக் கொண்டிருந்த மாத இதழ்
 தமிழ் இலெமுரியா. இதழாசிரியர் சு.குமணராசனின் வரிகளை
 வாசிக்கும் போது தொண்டைக்குழி வறண்டு போனது.
 விழிகள் நிறைந்து மனம் கனத்து
அடுத்த வரிகளுக்கு நகர முடியாமல் .. என்னை...
கடந்த பிப்ரவரி திங்களில் குமணராசனைப் பற்றிப் பேசும் 
வாய்ப்பு கிடைத்தப்போது
சொன்ன வரிகள் இப்போது நினைவுக்கு வருகிறது.

நாங்கள் கனவு கண்டோம்
எங்கள் கனவில் ஒரு மும்பை இதழ்
நாங்கள் கனவு கண்டோம்
எங்கள் கனவில் ஒரு பதிப்பகம்
நாங்கள் கனவு கண்டோம்
எங்கள் கனவில் ஒரு நூலகம்
நாங்கள் கனவு கண்டோம்
எங்கள் கனவில் ஒரு அறக்கட்டளை
நாங்கள் கனவு கண்டோம்
நாளையும் நாங்கள் கனவு காணுவோம்
கனவு எங்கள் பிறப்புரிமை
எங்கள் கனவுகள் வாழ
வாழ்த்துகிறோம் உங்களை
தமிழ் இலெமுரியா மாத இதழ், தமிழ் இலெமுரியா பதிப்பகம்,
 தமிழ் இலெமுரியா அறக்கட்டளை, தமிழ் இலெமுரியா சீர்வரிசை சண்முகராசனார் நூலகம்.... என்ற வரிசையில்
மும்பையில் எங்கள் கனவுகளை நனவாக்கிக் கொண்டிருந்தவர் 
திரு குமணராசன் அவர்கள்.
அந்தப் பயணத்தில் 9 வருடங்களாக தொடர்ந்து மாத இதழாக வெளிவந்துக்கொண்டிருந்த தமிழ் இலெமுரியா மாத இதழ் 10 வது ஆண்டு சிறப்பிதழுடன் விடை பெறுவதாக
அவர் எழுதி இருக்கிறார். அதிலிருந்து சில  துளிகள் :
*ஒவ்வொரு இதழும் கொண்டு வர ஆகும் செலவு சற்றொப்ப 2 இலட்சம் ரூபாய்.
*12 அயல் நாடுகளுக்கு இதழ் அனுப்பப்பட்டாலும் இன்றுவரை ஒரு டாலர் கூட பணம் வரவில்லை. பாராட்டுரைகள் மட்டுமே வந்தன.
*தமிழக அரசு நூலகங்களுக்கு இதழை வாங்க ஆணையிடப்பட்டது என்றாலும் 2014-15, 16, 17 ஆண்டுகளுக்கான நிலுவை மட்டும் ரூ 850,000/
*கடந்த 9 ஆண்டுகளாக தமிழ் இலெமுரியா இதழ் கொண்டு வர தன் சுய சம்பாத்தியத்திலிருந்து
செலவு செய்த தொகை சற்றொப்ப ஒரு கோடியே பத்து இலட்சம்.
 *அண்மைக் காலத்தில் உறுப்பினர் கட்டணத்தை ஓராண்டுக்கு மேலாக செலுத்திய
வாசகர்கள் எஞ்சியுள்ள பணத்தை திரும்பப் பெற விரும்புவோர் எம் அலுவலகத்தைத்
தொடர்பு கொண்டு பெற்றுக் கொள்ளலாம்.
*தற்போது கொடுப்பதற்கும் இழப்பதற்கும் எதுவுமில்லை என்ற நிலையில் இதழைத் தொடர்ந்து
வெளிக்கொணர முயல்வது அறிவுடைமையாகாது. இயலாது என்பதே இயல்பாகும்.
* சேய்தனை இழந்த ஓர் தாயின் மனநிலையில் யாம் விடை பெறுகிறோம்.....

நாங்களும் தாயை இழந்த சேய் போல... இத்தருணத்தில்.
திரு குமணராசன் அவர்களே எழுதியிருப்பது போல அவருக்குப்
 பரிவு காட்டாவோ கருணை காட்டாவோ நானும் விரும்பவில்லை
தமிழ் இலெமுரியாவுக்கு விடை கொடுக்கும் இத்தருணத்தில்.. சில வரிகள்..
" சினிமா துளிகளோ கவர்ச்சிப் படங்களோ
ஜோசியர் நட்சத்திர பலன்களோ எல்லாவற்றுக்கும் மேலாக
 விளம்பரங்களோ இல்லாமல் இதழ் பணி தொடர்வது
 சாத்தியமில்லை. அதுவும் அப்படியான ஒரு இதழை
 தொடர்ந்து தொய்வின்றி 9 ஆண்டுகள்
மாதச் சம்பளத்திலிருந்து எடுத்து செலவு செய்து
 தனி ஒரு நபராக கொண்டு வந்திருப்பது 
என்பதே இமாலய சாதனை தான். 
. இந்த ஒன்பது ஆண்டுகள் மும்பை வரலாற்றில் 
ஆகச்சிறந்த ஏடாக தன்னை நிலை நிறுத்திக்கொண்டுதான்
தற்காலிகமாக தமிழ் இலெமுரியா இளைப்பாறுகிறது .
ஒரு கதவை மூடினால் ஓராயிரம் கதவுகள் திறக்கும்.
வானம் நம் வசப்படும்."

#தமிழ்_இலெமுரியா
http://www.tamillemuriya.com/LemArticleFull.php?as=1286

Friday, April 21, 2017

எட்டப்பனுக்கெல்லாம் சூடு போட்ட கட்டப்பா..

Image result for பாகுபலி சத்தியராஜ்

அப்படிப்போடு ராசா
நீ வருத்தம் தெரிவிச்சப் பாருய்யா
அது உன் பெருந்தன்மை மட்டுமல்ல.
உன் பொருட்டு உன் சக தொழிலாளி நஷ்டமடையக்கூடாதுனு
நீ உண்மையாகவே கவலைப்பட்டுக் காட்டிய மனித நேயமய்யா..

நீ வருத்தப்பட்டதைக் கூட மன்னிப்பு கேட்டதா சொன்னவர்களுக்கு
சூடு சுரணை வர்ற மாதிரி நீ கடைசியா சொன்னப்பாருய்யா ராசா..
அதுதான் சத்தியமான வார்த்தை
. போதும்ய்யா.. அதுபோதும்.
இன்னும் தமிழ்நாட்டில் கலைஞன் உயிருடனும் உயிர்ப்புடனும்
வாழ்ந்துக் கொண்டிருக்கிறான் என்பதைக் காட்ட.

"இனிவரும் காலங்களிலும் தமிழ் ஈழ மக்களின் பிரச்சனையாக இருந்தாலும் சரி விவசாயிகளின் பிரச்சனையாக இருந்தாலும் சரி தமிழக மக்களின் அனைத்து நியாயம் சார்ந்த பிரச்சனைகளுக்கும் தொடர்ந்து குரல் கொடுத்துக் கொண்டுதான் இருப்பேன் என்பதைத் தெள்ளத் தெளிவாக கூறிக்கொள்கிறேன்."
இப்படி நான் கூறுவதால் இந்த சத்தியராஜை வைத்து படம் எடுத்தால்
எதிர்காலத்தில் தொல்லைகள் வரும் என்று கருதும் தயாரிப்பாளர்கள் தயவு செய்து இந்த சாதாரண சின்ன நடிகனை தங்கள் படங்களில் ஒப்பந்தம் செய்ய வேண்டாம் , என்னால் நஷ்டமடைய வேண்டாம்
என்று மிகவும் தாழ்மையுடன் கேட்டுக்கொள்கிறேன். ஏனேன்றால்
இரு நடிகனாக இறப்பதை விட எந்த விதமான மூட நம்பிக்கையும் இல்லாத ஒரு தமிழனாக இருப்பதும் இறப்பதும் தான் எனக்கு பெருமை, மகிழ்ச்சி.."
நன்றி சத்தியராஜ்.
"பாகுபலி என்ற மிகப்பெரிய படத்தின் ஒரு மிகச்சிறிய தொழிலாளி
தான் நான். என் ஒருவனது செயலின் பொருட்டு சொற்களின் பொருட்டு பல ஆயிரம் பேர்களின் உழைப்பும் பணமும் விரயம்
ஆவதை நான் விரும்பவில்லை. அதுமட்டுமல்லாது, கர்நாடக மாநிலத்தில் பாகுபலி இரண்டாம் பாகத்தை வாங்கிய விநியோகஸ்தர்கள் திரையரங்க உரிமையாளர்களும் பாதிக்கப்படாமல் பாதுகாக்கும் கூடுதல் பொறுப்பும் எனக்கு உள்ளது'
உண்மைதான் சத்தியராஜ். கர்நாடக மாநிலத்தில் உங்களுக்கு
சொந்தமான எந்த தொலைக்காட்சியும் இல்லை. வணிக வளாகங்கள்
இல்லை, கட்டிடங்கள் இல்லை, தோட்டம் இல்லை, இந்த
மன்னிப்பு முழுக்க முழுக்க உங்கள் பொருட்டு ஒட்டு மொத்த
திரைப்படக்குழுவுக்கும் நஷ்டமோ பிரச்சனையோ ஏற்பட்டுவிடக்கூடாது என்ற அக்கறையின் காரணமாகவே
வந்திருப்பதை உணர்ந்து கொள்கிறோம்.
சூப்பர் சத்தியராஜ். 
நாங்கள் வாழும் காலத்தில் வாழும் தமிழ் நடிகன் நீ என்பதில்
பெருமை அடையும் தருணம் இது.. 
விடை தெரியாத இன்னொரு கேள்வி...
9 ஆண்டுகளுக்கு முன் நீங்கள் பேசிய பேச்சுக்கான எதிர்வினை
இது என்றால்... இந்த 9 ஆண்டுகளில் உங்களின் எத்தனையோ
 திரைப்படங்கள் வந்திருக்கின்றன. கன்னட ரசிகர்களும்
பார்த்திருக்கிறார்கள். ஏன் பாகுபலி 1 கூட வந்தபோது
நடக்காத எதிர்வினை ஏன் இப்போது..?
தமிழ் கலை இலக்கிய உலகில் இனி
 எவனும் இனி வாய் திறந்து மொழி இனம்
குறித்துப் பேசிவிடக்கூடாது என்று யாரோ நினைக்கிறார்கள்..!

Monday, April 17, 2017

கல்லறைகளின் அரசியல்



ஜோதிடர்கள் சுபஹோரைகள் கூடிய சுபதினத்தை
 குறித்துக் கொடுக்கிறார்கள். அந்தநாளில் தான் குழந்தைகளைப் பெற்றுக்கொள்கிறார்கள்
பெண்கள். பிரசவவார்டில் சிசரியன் குழந்தைகள் பிறக்கும்போதே
சுக்கிரதிசையுடன் வளர்பிறையில் பிறக்கின்றன.
பெற்றோர் மட்டுமல்ல, மருத்துவர்களும் செவிலியரும் கூட
மகிழ்ச்சிக்கடலில் மிதக்கிறார்கள்.
ஜனனம் மட்டுமல்ல, மரணத்தையும் சிலருக்காக  சிலர்
தீர்மானிக்கிறார்கள். எந்த மாதம் எந்தநாளில் எப்போது
மூச்சுக்குழாயை இழுத்து மரணத்தை அறிவிக்கலாம் என்பதையும்
ஏற்கனவே தீர்மானித்துவிடுகிறார்கள்
எரிக்கலாமா புதைக்கலாமா
யமுனையிலா கங்கையிலா வற்றிப்போன காவிரியிலா
எல்லாம் தீர்மானிக்கப்படுகிறது.
கல்லறைக்கான பளிங்குகற்களைக் கூட வாங்கிவைத்துவிடுகிறார்கள்.
இரங்கற்பா முதல் டிவி நிகழ்ச்சிவரை எல்லாம் தொகுக்கப்பட்டு
வெளியீட்டுக்காக காத்திருக்கின்றன..
கல்லறைகளின் தலைநகரில் 
புதர்கள் சூழ்ந்து ஆள் அரவமின்றி கிசான்கட்.
கல்லறைகளுக்கும் அரசியல் இருக்கிறது.
பூத உடல்கள் அரசியல் நடத்துகின்றன.
 எரியாதப் பிணங்களை ஆற்றில் தள்ளி
சொர்க்கத்துக்கு அனுப்பி வைக்கும்
தொண்ணூறு சுடுகாடுகள்
கங்கைக்கரையில் விழித்திருக்கின்றன.
டிசம்பர் 6ல் புத்தனைக் கொலை செய்கிறார்கள்.
சுடலைப்பொடிப் பூசியவன் தோள்மேல் கங்காளத்தின் கண்கள்
கொலைவெறியுடன் கூத்தாடுகின்றன.
கிழக்குமுகமாக அமர்ந்து 12 நாட்கள்  தினமும்  1000 தடவை
மந்திரம் சொல்ல ஆரம்பித்துவிட்டான் குருபகவான். .
உடல் உயிர் அரசியல்

Thursday, April 13, 2017

அம்பேத்கரின் அவளுக்கு என் நன்றி






அறிவாயுதம் ஏந்திய அண்ணல் அம்பேத்கருக்கு
ஆத்மார்த்த தோழியாய் ஒருத்தி இருந்தாள்.
1920 களில் இலண்டனில் மதிய உணவுக்கு வழியின்றி
 இலண்டன் மியுசியத்தில் தன் பகல் பொழுதை அவர் கழித்த
 அந்த நாட்களில் அவளைச் சந்தித்தார்.
 அவள் பெயர் பிரான்சிஸ் பிட்ஜெரால்ட் (Francis Fritzgerald)
ஹவுஸ் ஆஃப் காமன் அலுவலகத்தில் டைப்பிஸ்டாக
வேலை செய்து கொண்டிருந்தார்.
கணவரை இழந்த அப்பெண்மணிக்கு இரு குழந்தைகள்.
இலண்டன் மியுஸியம் வாசலில் அவர்கள் சந்திப்பு.
அதன் பின் அப்பெண் தன் கடைசி நாட்கள் வரை
அண்ணலை நேசித்தார்.
1923ல் அம்பேத்கர் இந்தியா திரும்பியது முதல் 1943 வரை
 அப்பெண் அம்பேத்கருக்கு எழுதிய 91 கடிதங்கள் .
. அவைப் புத்தகமாக வெளிவருவதில் ஏகப்பட்ட சிக்கல்களும்
குழப்பங்களும். ஆனால் என்னைப் போன்றவர்கள்
குழப்பவாதிகளின் காரணங்களைச் செவிமடுக்க விரும்பவில்லை.

மை டார்லிங் பீம்... என்று ஆரம்பிக்கும் ப்ஃனியின்கடிதங்கள் ..
என் டார்லிங் பீம்...
உன் புகைப்படம் என்னருகில் என் மேசைமீது
ஆனால் எந்தப் பதிலும் சொல்லாமல்
என் முத்தத்தை எனக்குத் திருப்பித் தராமல்..."
அம்பேத்கருக்கு வேண்டிய புத்தகங்களை கப்பலில் அனுப்பி வைத்துக்கொண்டே இருந்த அறிவார்ந்த தோழியாய்..
நட்பின் உன்னதமாய்.. ஆத்மார்த்தமான காதலியாய்
(platonic relationship.) எந்த ஒரு எதிர்பார்ப்புகளும் இன்றி வாழ்ந்து மறைந்திருக்கிறாள்.

இந்துவாகப் பிறந்த நான் ஓர் இந்துவாக இறந்துப்போக மாட்டேன்
என்று அண்ணல் அறிவித்தப்பின் அம்பேத்கரை தேசவிரோதியாக சித்தரித்தார்கள். ஜனவரி 1937ல் அவர் இங்கிலாந்தில் ஒரு விதவையை இரகசியமாகத் திருமணம் செய்து கொண்டார் என்ற வதந்தியைப் பரப்பினார்கள்! ஆனால் அம்பேத்கர் அப்பெண்ணைத் திருமணம்
செய்து கொள்ளவில்லை. பிரான்சிஸ் எழுதிய கடிதங்களைப் பற்றி அவருடைய வாழ்க்கை வரலாற்றை மராத்தியில் எழுதிய
 கெர்மோடெவிடம் (C B Khairmode) அம்பேத்கர் சொன்ன
வரிகள் தான்  இப்பதிவை எழுதுவதற்கு எனக்குத் துணிவு தந்தது.
.
"நம் மக்களின் ஒழுக்கவியல் கோட்பாடுகள் ரொம்பவும்
 விசித்திரமானவை" என்று சொன்ன
அம்பேத்கர்
 "பிரான்சிஸ் பற்றிப் பேசினால் .. எனக்கு ஆட்சேபனை இல்லை.
இதனால் மக்கள் என்னைப் பற்றி தவறாக நினைக்க கூடும்
என்ற கவலையும் இல்லை"
என்று தெளிவாகச் சொல்லி இருக்கிறார்.

அறிவாயுதம் ஏந்தி எதிர்நீச்சல் போட்ட ஒரு போராளிக்கு
நட்பும் காதலும் அவன் இளைப்பாறும் நிழலாக
அவனை உயிர்ப்புடம் இயக்கும் ஜீவனாக
யுகம் யுகமாக  தொடர்கிறது.
அத்தொடர் பயணத்தில் பிரான்சிஸ் ஜெரால்ட் 
என்னளவில் ஓர் அற்புதமான பெண்.
அம்பேத்கருக்கு வாய்த்த அறிவான ஸ்நேகிதி.
அண்ணலின் பிறந்தநாளில் அந்த நட்புக்கு தலைவணங்கி..
அவள் வாழ்ந்த திசைநோக்கி கண்ணீருடன் கை கூப்பி..
(venkat shyam ஓவியம். event TOI LIT festival 2016 @Bandra)

Wednesday, April 12, 2017

இன்று அதிமுக ; நாளை திமுக.



இன்று அதிமுக நாளை திமுக
திராவிட அரசியலுக்கு ஓரு சோதனைக்காலம்
மாநில சுயாட்சி என்ற கூட்டாட்சி அரசியலை இந்திய மண்ணில்
டில்லியின் செங்கோட்டை நிமிர்ந்து பார்க்கும் அளவுக்கு
பேசியவர்கள் நாம். திராவிட அரசியலின் மாநிலசுயாட்சி  கொள்கை
இந்திய மண்ணின் மாநில கட்சிகளுக்கான அடிப்படை உரிமை.
இந்திய கூட்டாட்சி முறையின் இன்னொரு விரிவாக்கம்.
ஒரே கட்சி  ஒரே தேசம் ஒற்றை ஆட்சி என்பது இந்திய மண்ணையும்
மனிதர்களையும் வரலாற்று ரீதியாகவும் பூகோள ரீதியாகவும்
அறியாத அரசியல் கட்சிகளின் அதிகார வெறி.
இந்த அதிகார வெறிக்கு இன்று தமிழகம் பலியாடு ஆகிவிட்டது.
ஜெ வின் மரணமும் கலைஞரின் செயல்படா நிலையும்
இன்றைய தமிழகத்தில் ஏற்படுத்தி இருக்கும் வெற்றிடத்தை
 காற்றாக வந்து நிரப்பிவிட துடிக்கிறது பிஜேபி.
அதற்கு சாதகமாக இருக்கும் எவரையும் தன் வசப்படுத்திக்கொள்ள
துணிகிறது. எப்படியும் பெரும்பான்மை எம் எல் ஏக்கள் ஆதரவுடன் தமிழகத்தில் நடக்கும் அதிமுக ஆட்சியைக் கவிழ்த்துவிட்டால் போதும் , அடுத்து தங்கள் கட்சிதான் ஆட்சியைப் பிடிக்கும்
 (ஆட்சியைப் பிடிக்குமா?) என்ற அபரிதமான நம்பிக்கையில்
ஆட்சிக் கவிழ்ப்புக்கு துணை போகிறது திமுகவும்.
இன்றைக்கு ஒரு பெரும்பான்மையான கட்சியின் ஆட்சியை
ஊழல் என்றும் வருமானவரி என்றும் காரணம்காட்டி
கவிழ்த்துவிட்டால் நாளை இதே ஆட்சி கவிழ்ப்புக்கு
 திமுக மட்டும் விதிவிலக்காக இருக்க முடியுமா என்பதையும்
சேர்த்தே யோசிக்க வேண்டும்.
 இப்படியான ஜனநாயகப் படுகொலையைச்
செய்துவிட்டு ஆட்சிக்கு வருவதை விட
மக்கள் மன்றத்தில் பயணித்து முறையாக
தேர்தலைச் சந்தித்து தங்களால் மீண்டும்
ஆட்சியை அமைக்க முடியும் என்ற
திமுக காட்ட முடியும். திமுக வால் அது முடியும்.
அதற்கான தொண்டர் படையும்
உழைப்பும் ஆள்பலமும் பணபலமும் சகலமும்
திமுகவிடம் இன்னும் குறையாமல் இருக்கிறது.
அதிமுக ஆட்சியை இன்று கவிழ்த்துவிட்டு ஆட்சிக்கு வந்துவிடலாம்.
ஆனால் அதே ஊழல் வருமானவரியை காரணம் காட்டி திமுகவின் அரசியலையும் பிஜேபி ஒழித்துக்கட்டும்.
அதற்கு வழிவிடப்போகிறார்களா
அல்லது தலைநிமிர்ந்து பிஜேபிக்கு அரசியல் பாடம் நடத்தும்
துணிவுடன்  நிகழ்கால வெற்றிடத்தை அர்த்தமுள்ளதாக
 மாற்றப் போகிறார்களா..?
இன்று அதிமுக. நாளை திமுக.

பிகு: துரைமுருகன் அண்ணாச்சி மற்றும் தமிழிசை அக்கா இருவரும்
உளறுவது போல இருந்தாலும் அவை உளறல்கள் மட்டுமல்ல.
உடையும் ரகசியக் கசிவுகள்.

Monday, April 10, 2017

இது டிரெய்லர் தான்

Image result for modi cartoon
"ரொம்ப டேஞ்சரானா ஆளுப்பா மோடிஜி."
ஆர் கே நகரில் தினகரன் வெற்றி பெற்றுவிட்டால்..
அவ்வளவுதான் ஓபிஎஸ் க்கு மட்டுமா அரோகரா.
எல்லோருக்கும் தான்.
எல்லோரும் மொட்டை அடிச்சி முக்காடு போட்டுக்க
வேண்டியதுதான்.
ஜெ தீபா வெற்றி பெற்றுவிட்டால்
புதுசா இன்னொரு கட்சி  முளைக்கும்..
அரசியல் விளையாட்டு ரொம்பவும் தமாஷா போயிடும். .
ஓபிஏஸ் அணி வெற்றி பெற்றுவிட்டால்
நாங்க தான்  அ அ திமுக - அதாவது
அசல் அதிமுகனு அழிச்சாட்டம்  பண்ணி
உண்டு இல்லைனு இரட்டை இலையை பிச்சி எடுத்திடுவாங்க
. ஸ்டாலின் தலைமையில் திமுக வெற்றி பெற்றுவிட்டால்..
அதிமுக வின் பெரும்பான்மையை தங்களின் இந்த
 ஒற்றை வெற்றியை வைத்து கேலிக்கூத்தாக்கி
இப்பவே ஆட்சியைக் கலைக்கவும் தேர்தல் நடத்தவும்
 என்னவெல்லாம் செய்யமுடியுமே
அதை எல்லாம் டில்லியில் ஷிப்ட் முறையில் போயி வந்து
வந்து போயி  மே மாத வெயிலில் அனைவரையும்
மண்டைக்காய வைத்திருப்பார்கள்.
 ஒருவேளை நம்ம கரகாட்டம் கங்கை அமரன் வெற்றி
பெற்றுவிட்டால் ... அய்யய்யோ
கற்பனை இப்படி எல்லாம் கொஞ்சம் ஓவரா போகக்கூடாதுனு
சொல்றீங்களா..
என்னவொ ... இவர்கள் அனைவருக்கும் வைத்தாரு பாருங்க
மோடிஜி ஒரு ஆப்பு.. பூ னு ஊதித்தள்ளின மாதிரி இருக்கே..
ரொம்ப டேஞ்சரானா ஆளுப்பா மோடிஜி.
இது சும்மா ஒரு டிரெய்லர்தான் !

Thursday, April 6, 2017

GST ஜீ பூம்பா ..


ஒரு தேசம் ஒற்றை வரி
காஷ்மீரும் கன்யாகுமரியும் ஒன்றாகிவிட்டது.. ஆஹா..
தமிழ்நாடும் பீஹாருன் ஒன்றாகிவிட்டது..
GST .. ஜீ பூம்பா.. GST .. ஒரு மந்திரச்சொல்.. 
ஜீ பூம்பா. GST .. GST .. GST ..
இதுதான் தற்போது நம் நாடாளுமன்றத்திலும் மேல்சபையிலும் ஏற்றுக்கொள்ளப்பட்டிருக்கும்
GST .. ஜூலை 1 முதல் அமுலுக்கு வரப்போகும் GST ..
பல்வேறு மறைமுக வரிகளை நீக்கிவிடும் என்றும் 
இடைத்தரகர்கள் இருக்கமாட்டார்கள் என்றும் 
ஆகையினால் பொதுமக்களுக்கு குறைந்த விலையில் 
அன்றாட பொருட்கள் கிடைக்கும் என்றும் மோதி அரசு அலங்காரமான அறிவிப்புகளுடன் தேசம் முழுமைக்குமான ஒற்றை வரி முறையை 
உரக்கப் பேசுகிறது.
ஆனால் இந்தியச் சட்டப்படி இந்தியாவிலிருக்கும் 
அனைத்து மாநிலங்களும் ஒரே வரி விகிதத்தைக் கடைப்பிடிக்க வேண்டும்
 என்ற கட்டாயமில்லை.
அத்துடன் அரசு வசூலிக்கும் வரிகள் மூன்று வகையாக இருக்கின்றன
நடுவன் அரசு வரி
மாநில அரசு வரி
நடுவண் அரசும் மாநில அரசும் சேர்ந்து வசூலிக்கும் வரி.
இந்த மூன்று முறைகளை எப்படி ஒற்றை வரி முறையில்
 கொண்டுவர இருக்கிறார்கள் என்பதைப் பற்றி இதுவரை 
எந்த ஒரு செயல்திட்டமும் அரசு வெளியிடவில்லை.

பொருட்களின் கொள்முதல் விலையை
வியாபாரிகள் அவர்கள் இலாபத்திற்கு ஏற்ப தீர்மானிக்கும் வசதியை வழங்கி இருப்பதால் பொருட்களுக்கான வரி விகிதம் மட்டுமே 
பொருட்களின் விலையை மலிவாக்கும் என்பதும்
 பொதுமக்கள் பலனடைவார்கள் என்பதும் ஏற்றுக்கொள்ள முடியாதவை.
இவை எல்லாவற்றையும் விட இன்னொரு முக்கியமான கருத்து... 
பரந்த இந்திய தேசத்தின் பூகோள ரீதியான நிலப்பரப்பை
 நடுவண் அரசு கண்ணை மூடிக்கொண்டு செயல்பட்டிருப்பது தெரிகிறது.
 அதுவும் குஜராத்தில் முதல்வராக இருந்த மோதி.
 குஜராத்தின் வரி விதிப்பு ஏன் மற்ற மாநிலங்களின் வரி விதிப்பிலிருந்து வேறுபட்டிருக்கிறது என்பதை நன்கு அறிந்தவர்.
அதற்கான அனைத்து காரணங்களும் நிர்வாக ரீதியாகவும் 
அறிந்தவர் தான். இப்போது அவரே சொல்கிறார்... 
குஜராத்தும் அசாமும் ஒன்றுதான்.
மகாராஷ்டிராவும் தமிழ்நாடும் ஒன்றுதான் என்று!
அவர் டில்லியிலிருந்து எது சொன்னாலும் சரியாகத்தான் இருக்கும். 
அதை நாம் நம்பியே ஆகவேண்டும்.
(The GST is bound to lead to serious difficulties, and could possibly fail, because it seeks to treat unequal states equally)

இப்படியான ஒற்றை வரிவிதிப்பின் மூலம் மாநில அரசுக்கு ஏற்படும் வரி இழப்பு/ வருவாய் இழப்பை மாநில அரசு எப்படி எதிர்கொள்ளப்போகிறது? மாநில அரசுக்கு மத்திய அரசு இழப்பீடு வழங்குமா என்ன? அதை யார் தீர்மானிப்பார்கள்? வறட்சி நிவாரணத்திற்கே ஆயிரம் ரூபாய்க் கேட்டால் வெறும் ஐம்பது ரூபாயை எடுத்து வீசுகிற மத்திய அரசு மாநில அரசின் வருவாய் இழப்பை எம்மாதிரி அணுகும்?!!
Image result for gst cartoon

இதற்கெல்லாம் நமக்கு நேரமில்லை.. என்னவோ நடக்குது நடக்கட்டும்.
தற்போது நமக்கும் நம் அரசியல்வாதிகளுக்கும் இருக்கும் மாபெரும் பிரச்சனை
ஆர் கே நகர் தேர்தல் மட்டுமே.. அதுவல்லவா நம் அனைவரின் வாழ்க்கையையும் மாற்றப்போகிறது!

Tuesday, April 4, 2017

VOTE FOR THE CROOKS

Image result for when crime pays

vote for the crook, its important
குற்றவாளிக்கு- கிரிமினலுக்கு ஓட்டுப் போடுங்கள்.
அது முக்கியம், இன்றைய தேவை என்றெல்லாம் கூட
 பிரச்சாரமே செய்து தேர்தலை சந்தித்த களங்கள்
உலக நாடுகளில் உண்டு.

ROUBA, MASFAZ
HE ROBS, BUT HE GETS THINGS DONE
ரூஃபா.., மஸ்ப்ஃஷ் என்ற போர்ச்சுக்கிசிய சொற்றொடரின் பொருள்
"அவன் திருடுகிறான். ஆனால் காரியங்களை செய்ய வைக்கிறான்"
அதாவது நமக்குப் புரிகிறமாதிரி சொல்ல வேண்டும் என்றால்
லஞ்சம் ஊழல் செய்யும் திருடன். வாங்குகிற லஞ்சத்திற்கு
 ஏமாற்றாமல் வேலையைச் செய்து முடிப்பவன்...
 இப்படியானவர்களை நாம் திறமைசாலிகள், புத்திசாலிகள், பிழைக்கத்தெரிந்தவன் என்றெல்லாம்
சொல்லி பாராட்டுகிறோம். இதை அறிந்த அந்நாட்டின் மேயர்
பவ்லா மாலுஃப் தன் மின்னஞ்சல் முகவரியைக் கூட maluf@masfaz.com
என்று வைத்திருக்கிறார்.
திருடன், கிரிமினல் , குற்றவாளி, ஊழல் செய்தவன்,
 சாராயம் காய்ச்சுபவன், கள்ளக்கடத்தல்காரன்,
 கொலை செய்தவன், எவனாக இருந்தாலும்
ஓட்டு வேட்டையில் வெற்றி பெற முடியும்.
மக்களும் அரசியல் கட்சிகளும் தேர்தலில் தங்கள் வேட்பாளர்களாக
ஏன் இம்மாதிரி கிரிமினல் குற்றவாளிகளை தேர்வு செய்கிறார்கள்?
அவர்களும் வெற்றி பெறுவது எப்படி?
மக்கள் அவர்களிடன் நவீன ராபின்குட் அவதாரத்தை
 எதிர்பார்க்கிறார்களா? இது என்னமாதிரி உளவியல்..!
புள்ளிவிவரங்களுடன் உண்மையான தேர்தல் களத்தை
வேட்பாளர்களின் குற்றப்பட்டியலுடன் நம் முன் வைக்கும்
இப்புத்தகம் மக்களாட்சியின் மகத்துவத்தைக் கேள்விக்குறியாக்கி
நம்மை கொஞ்சம் பயமுறுத்தி சிந்திக்க வைக்கிறது.
சாராயவியாபாரிகள் எல்லோரும் கல்வித்தந்தைகளான
காலத்தில் நாம் வாழ்ந்துக்கொண்டிருக்கிறோம்.
எனவே நிஜம் நம்மைப் பயமுறுத்துகிறது.
சரி..
இப்படி ஒரு புத்தகத்தை தமிழ்நாட்டு அரசியலை
 மட்டுமே வைத்துக்கொண்டு எழுதினால் ... எப்படி இருக்கும்.?
என்று யோசித்துப் பார்க்கிறேன். ! நீங்களும் கொஞ்சம் கற்பனை
செய்து பாருங்கள்... அடடா...
இனி இறுதியாக ஒரு வரி..
இந்தப் பதிவின் முதல்வரியை ஏடாகூடமா ஆர் கே நகர் தேர்தலோடு
சேர்த்து நீங்கள் வாசித்தால் அதற்கு நான் பொறுப்பல்ல.

Monday, April 3, 2017

சோ தர்மனின் சூல்..வெற்றிலைகள்

Image result for சோ தர்மனின் சூல்


சூல் கொண்ட கண்மாய் மீன்கள் துள்ளிக்குதிக்கின்றன.
அந்த கறுத்த பனைமரத்தின் அரசியல் என்னைப் பயமுறுத்துகிறது. 
தொட்டில் கட்டவும் கிளைகள் இல்லாத பனைமர நிழலில் 
என் பிள்ளைகள் காற்றில் தொட்டில் கட்டி
 வெயிலில் உறங்குகிறார்கள்.


ஒரு வாரமாக சூல் கதைப் பாத்திரங்களுடன் நான்.. 
என் நினைவுகள் வாழும் வரை கொப்புளாயி என்னுடன் இருப்பாள் .. 
வெற்றிலையைப் பார்க்கும் போதெல்லாம்
உருளைக்கொடி மகாலிங்கம் பிள்ளையும் தாமிரபரணி நாடாரும் வெற்றிலைக்கொடிக்கருகில் என்னுடன் உரையாடுவார்கள். 
அந்தக் கண்மாயும் நீர்ப்பாய்ச்சியும்
வரலாற்றின் சுவடுகளாய் என் மண்ணின் பெருமையை 
மண்ணை நம்பி வாழ்ந்த எம் மக்களின் மகத்துவத்தை
எப்போதும் சொல்லிக்கொண்டே இருக்கும் .. 
குஞ்ஞான் அரண்மனை சிறையில் அடைக்கப்பட்டு 
சித்தரவதைக்குள்ளாகும் போது சொல்லும் அருள்வாக்குடன்
 சூல் என்னளவில் முடிந்துவிடுகிறது.
அதாவது 406 வது பக்கத்துடன் முடிந்துவிடுகிறது.
 பக் 407 முதல் 500 வரை...? 
சூல் ... .
விமர்சனங்களுக்குரிய பல்வேறு அரசியல் நிகழ்வுகள்
நடைபெற்ற காலக்கட்டத்தில் ஒரே ஒரு தலைவரை மட்டும்
 கதைப் பாத்திரத்துடன் இணைத்து வைத்து
சொல்லப்படும் கிண்டல் -- பக் 459 - இதை வெறும்
உரையாடலாக மட்டும் எண்ணி என்னால்
 கடந்து செல்ல முடியவில்லை. தருமன்...

சூல் கதைமாந்தர்கள் நிஜமானவர்கள். சந்தேகமில்லை.
கொண்டாடப்பட வேண்டிய சம்சாரிகள்.
 ஆனால் இதெல்லாம் சமூகத்தின் ஒரு பக்கம் மட்டும் தான்.
இதையும் தாண்டிய தீண்டாமையும் பெண் அடிமைத்தனமும் 
சாதியமுகமும்
இதே சூல் பிரசவித்த சமூகத்தின் இன்னொரு பக்கம்.
நீர்ப்பாய்ச்சியின் திறமையைக் கொண்டாடும் போது
அதுவே அவனுக்கான தந்தைவழி சொத்தாக அறிவாக
மாற்றம் பெறும் அரசியல் என்னைப் பயமுறுத்துகிறது.

... எல்லோரையும் போல நானும்
 இந்த அரசியல் பார்வைகளை எல்லாம் ஒதுக்கி வைத்துவிட்டு..
வாசிக்கப் பழக வேண்டும். 

சூல்... சூல்.. சூல் ..
பனிக்குடம் உடைந்து கண்மாய் எங்கும் தண்ணீர்..
மீன்கள் துள்ளிக் குதிக்கின்றன.
கரையோரத்தில் பனைமரங்கள்.
தாமிரபரணி என் கனவில் மட்டும் கரைபுரண்டு ஓடிக்கொண்டிருக்கிறது.
என் ஆச்சி வெற்றிலை இடிக்கும் சத்தம்..
சூல்.. கதைமாந்தர்களையும் தாண்டி என்னை
எனக்குள் என் வெற்றிலைகளைத் தேடி பயணிக்க வைத்தது.
 எப்போதாவது தான் வாசிப்பில் இப்படியான அனுபவங்கள் ஏற்படும்.

Wednesday, March 29, 2017

இது ரொம்ப ப்டிச்சிருக்கு மனுஷ்யபுத்திரன்

Image result for மனுஷ்யபுத்திரன்

எனக்கு ஒரு பெயர் இருப்பதுதான் பிரச்சினையா
 அல்லது நான் இருப்பதே பிரச்சினையா என்று
 குழப்பமாக இருக்கிறது....
ச்சே சே.. இதெல்லாம் என்ன குழப்பம்.
அப்படி எல்லாம் உங்களை விட்டுவிட மாட்டோம் ஹமீது.

. இந்த மொழிக்காகவும் பண்பாட்டுக்காகவும் நான் செய்திருக்கும் வேலைகளுக்காக நான் எந்த பிரதியுபகாரமும் கேட்கவில்லை. வாடகைக்கு ஒரு வீடுதான் கேட்கிறேன். 
இது.. இது சரியான கேள்வி ம.பு
. இன்றுவரை உங்களைப் போன்று நம் சமூகத்திற்காக
மொழிக்காக உழைத்தவர்கள் வாடகை வீட்டில்
 இருக்கிறார்கள் என்பதைக் கூட
என் போன்றவர்களுக்கு நம்ப முடியவில்லை!
அதுவும் அண்மை காலங்களில் தொலைக்காட்சிகளின்
 ஊடாக நீங்கள் சார்ந்து பேசும் அரசியல் கட்சி உங்களை
இன்றுவரை வாடகை வீட்டிலா வைத்திருக்கிறார்கள்!
 என்ன கொடுமை ம.பு!
இதை வன்மையாக கண்டிக்கிறேன் ம.பு.

இஸ்லாமியர்களுக்கு வீடு தரக் கூடாது என்ற மனோபாவம் இவ்வளவு ஆழமாக இங்கே எப்போது ஊடுருவியது? இல்லாமியர்கள் அசுத்தமானவர்கள், வன்முறை யாளர்கள், தேச விரோதிகள் என்ற பிரச்சாரம் சமூகத்தின் அடியாழம் வரை எப்போது ஆழமாகப் பரவியது? தெரியவில்லை!

டியர் ம.பு.... நீங்கள் சொல்வதைப் பார்த்தால் பிஜேபி
அடுத்து ஆட்சிக்கு வந்துவிடும் போலிருக்கிறதே! நீங்கள் குறிப்பிடும் மேற்கண்ட சொற்றொடர்கள் அவர்கள் சொல்வது போல இருக்கிறதே..
மேலும் நீங்கள் சார்ந்திருக்கும் திமுக வாகட்டும்
திராவிட அரசியலாகட்டும்..
தொடர்ந்து ஆட்சி செய்த தமிழகத்தில் இந்த நிலைமையா?
 நீங்கள் திராவிட அரசியலையே நடுத்தெருவுக்கு இழுத்துக்கொண்டு வந்துவிட்டீர்கள். என் போன்றவர்களுக்கு
அது கொஞ்சம் மனக்கஷ்டமாக இருக்கிறது ம.பு.

எனக்கு இங்கு இடமில்லையா என்று இதுவரை 
கேட்டுக்கொண்டிருந்த நான் இப்போது
 முதல் முறையாகக் கேட்கிறேன்
 ‘‘எங்களுக்கு இங்கு இடமில்லையா?’’
நான் - நாமாக மாறியதும்
என் - எங்களாக மாறியதும்...
சூப்பர். இது .. #இது ரொம்ப ப்டிச்சிருக்கு மனுஷ்யபுத்திரன்.#

உங்களுக்கு விரைவில் வேளச்சேரியிலோ அல்லது
 போயஸ் கார்டனில் ரஜினிகாந்தி வீட்டுக்கு அருகிலோ
 சொந்தமாக ஒரு வீடு அமையவேண்டும்.
வீடு மனை அமைய சனிப்பகவானை உங்களுக்காக வழிபடுகிறேன்.

ஓம் சனீஸ்வராய வித்மஹே
சாயாபுத்ராய தீமஹி
தன்னோ சனிஹ் ப்ரசோதயாத்

Sunday, March 26, 2017

உன்னை வாசிக்கவில்லை



Image result for why do read

நான் உன்னை வாசிக்கவில்லை.
உன் புத்தகங்கள் தடிமனாக இருக்கின்றன.
அதிக விலைக்கு விற்கப்படுகின்றன.
உன் விருதுகள் என்னைப் பயமுறுத்துகின்றன
நான் உன்னை வாசிக்கவில்லை.

உன்னை வாசிக்கும் உயரத்தை எட்ட வேண்டும்.
காய்களை நகர்த்துகிறேன்.
ஏணிகளுக்கு அருகில் பாம்பின் வழித்தடம்
நீ  ஏதோ சொல்லுகிறாய் என்னிடம்
எல்லோரும் உன்னை வாழ்த்துகிறார்கள்.
வாழ்த்துக் கூச்சலில் உன் குரல்
காற்றில் கற்பூரமாய் கரைந்துவிடுகிறது.
கழுதைகள் அறியாது கற்பூரவாசனையை என்கிறாய்.
கழுதைகளைப் பற்றி அறியாதவர்கள் 
நீ சொல்வதே சரி என்கிறார்கள்.
கழுதைகளிடம் யாரும் கேட்கவில்லை. 
தாழம்பூ மணக்கும் நதிக்கரையோரம்
என் கழுதைகள் இளைப்பாறுகின்றன.
உன்  அழுக்கடைந்த ஆடைகளை
வெள்ளாவி பானைக்குள் திணித்து தீமூட்டுகிறேன்.
பிரம்மனின் நான்காவது தலை  வெடித்து சிதறுகிறது.
நான் உன்னை வாசிக்கவில்லை.
வாசிக்கப்போவதுமில்லை.


Friday, March 24, 2017

அரசியல் உளறல்கள்

Image result for அரசியல் கோமாளிகள்



உளறல்கள் பலவிதம்..
அதில் ஒவ்வொன்றும் ஒருவிதம்
உளறல்கள் எப்போதாவது உண்மையாகிவிட்டால்
 பரவாயில்லை.
சிலர் உளரும் போது என்னவோ அவர்கள்
  சொல்ல வருகிறார்கள் என்று யோசிக்க வேண்டி இருக்கிறது
.என்ன மாதிரி ஒரு நிலை வந்திடுச்சிடா சாமி.!

உதாரணத்திற்கு சில உளறல் கில்லாடிகளின் அண்மைய உளறல்கள்

தமிழ்நாட்டில் ஆறு மாதத்திற்குள் திமுக ஆட்சியைப் பிடிக்கும்
என்று உச்சக்குரலில் முழக்கமிடுகிறார் துரைமுருகன்.
 ஜெ வின் மறைவுக்குப் பின் அடிக்கடி கேட்கும்
 இக்குரலும் அதன் பின் நிகழும் சில மெகா காட்சிகளும்
மெரீனா முதல் சட்டசபை வரை ...
இதோடு சேர்த்து புரிந்து கொள்ள வேண்டி  இருக்கிறது.

அதிமுக பிளவுபட்டதைத் தொடர்ந்து அந்தக் கட்சியின்
இரட்டை இலைச் சின்னம் முடக்கப்பட வாய்ப்பு இருப்பதாக
தொடர்ந்து கூறிவந்தார் தமிழிசை சவுந்தரராஜன்
இரட்டை இலைச் சின்னம் முடக்கப்பட்டதற்கும்
 பாரதிய ஜனதா கட்சிக்கும் எந்தத் தொடர்பும் இல்லை.
 ஆனால் இரட்டை இலைச் சின்னம் முடக்கப்பட்டது சரிதான்
என்று இப்போது கூறியுள்ளார்.

சசிகலா முதல்வராவதை எவரும் தடுக்க முடியாது
என்று தன் டுவிட்டரில் எழுதிய சு.சுவாமி
இரண்டு நாட்கள் கழித்து பல்டி அடித்தார்.
சசிகலா முதல்வராக வாய்ப்பே இல்லை
பிப் 9 ஆம் தேதிக்குப் பிறகு எல்லாம் தெரியவரும்
என்று ஜாதகம் கணித்தார்.

இவர்களின் உளறலுக்குப் பின் நடந்தது என்ன
என்று நமக்குத் தெரியும்.
கூட்டிக் கழித்துப் பார்த்தால்
 இவர்கள்  உளறிக் கொட்டுவதையும் கவனிக்க
வேண்டியதாகிவிட்டதே   என்ற கவலையுடன்.


.

Thursday, March 23, 2017

ஆதித்தியாநாத் யோகியும் மர்மநபர்களும்

Image result for yogi adityanath image



உ.பி. யின் முதல்வர் யோகி சர்வ வல்லமைப் படைத்தவர்.
33 துறைகளைக் கவனிக்கப் போகிறார் என்றால் சும்மாவா..!
உ.பி.யில் இருக்கும் பசுவதை கூடங்களை மூடப்போகிறார்.
இதில் மட்டும் சகிப்புத்தன்மையைக் காட்டக்கூடாது என்று
அதிகாரிகளுக்கு உத்தரவு. அதிரடி ஆட்டம் ஆரம்பித்துவிட்டது.
 கேட்டால் சட்ட விரோத பசுவதைக் கூடங்களை மூடப்போவதாக
 பிஜேபி தங்கள் தேர்தல் அறிக்கையில்
அறிவித்ததை செயல்படுத்தப்போவதாக சொல்லப்படுகிறது.
தேர்தல் அறிக்கையில் சொல்லிட்டா செயல்படுத்திடறது
 நியாயம்தானே! இருநாட்களுக்கு முன்  கன்சிராம் காலனியில் இருக்கும் இறைச்சி , மீன் கடைகளை மர்மநபர்கள் தீவைத்துக்
கொளுத்திவிட்டார்கள்.
யோகியின் சக்தி... ஆதித்தியா யோகியின் சக்தி.. 
மர்மநபர்கள் பலரை உருவாக்கும் சர்வ வல்லமைப் படைத்தது.
உங்கள் சக்தியின் முன்னால் எங்கள் ஜனநாயம் வெறும் தூசு.
யோகி ஆதித்தியா நமஹ..
(2)
உங்கள் சர்வவல்லமை சக்தியைப் பயன்படுத்தி
 உங்களின் புனித நதியான கங்கை மற்றும் யமுனையும்
காப்பாற்றுங்கள்.
கங்கையில் மட்டும் 1.5 பில்லியன் கழிவுநீர்
  (sewage )கலக்கிறது.
காசியில் செத்தால் சொர்க்கம் போகலாம் என்பதால்
 காசியில் மட்டும் 32000 எரிக்கப்பட்ட பிணங்கள்  மிதக்கின்றன.
அதனால் 300 டன் அளவு பிணங்களின் சதை நாற்றத்தால்
 அழுகிக் கொண்டிருக்கிறது கங்கை.
முடிந்தால் உங்கள் மர்மநபர்களைக் கொண்டு
 கங்கையைக் காப்பாற்றுங்கள்.. யோகிஜி.

மோதி நமஹ. யோகி ஆதித்தியா நமஹ.
ஓம் கங்கா ஸுதாய நமஹ

Wednesday, March 22, 2017

புத்தக அலைவரிசை

புத்தக அலைவரிசை

காந்தியை விட 6 மாதத்திற்கு மூத்தவர் கஸ்தூரிபா. 
அதுமட்டுமல்ல காந்திக்கு அவர் 3வது மனைவி.
 முதலிரண்டு பெண்கள் தவழ்ந்து விளையாடுவதற்கு 
முன்பே இறந்துவிட்டார்கள். ஆம்.. பிறந்தவுடனேயே 
நிச்சயிக்கப்பட்ட மனைவியர். கஸ்தூரிபாவின்
 அந்தக் கடைசி தருணங்கள்.. 
மகன் சொல்கிறான்.. "அம்மாவுக்கு ஊசி போட்டால் நல்லது "என்று.
 காந்தி அதைத் தடுக்கிறார். இயற்கையாக மரணத்தை
 வலியுடன் ஏற்றுக்கொண்டு அவள் தலையை எடுத்து
 தன் மடிமீது வைத்துகொண்டு..
வாசிக்கும் போது என்னடா இப்படியும் கிறுக்குத்தனமாக
 ஒரு மனுஷன் வாழ்ந்திருக்கிறானே என்று
 கோபம் கலந்த ஏதோ ஒரு வகையான ஈர்ப்பு ஏற்படுகிறது.
இன்னொரு புத்தகம்..
இதைத்தாண்டி காந்தியின் மூத்தமகன் ஹரிலாலில் கடைசி நாட்கள்
 ஒரு காவியத்தின் துன்பியல் காட்சிபோல விரிகிறது.
 ரேஷ்மாபாய் என்ற பாலியல் தொழில் செய்யும் பெண்
 போன் செய்கிறாள் திடீரென்று ஹரிலாலின் தம்பி மகன்
 கேசவ்லால் காந்திக்கு. கேசவ்லால் காந்தி ஹரிலாலின் மருமகன்
 சுரேந்திரபாய் க்கு போன் செய்து அழைக்கிறார்.
 இருவரும் கேசவ்லால் வீடிருக்கும் மாதுங்காவிலிருந்து புறப்படுகிறார்கள். பாலியல்தொழிலாளர் குடியிருப்பு பகுதியில் காந்தி குல்லாவுடன்
 இரவில் அலையும் அவர்களை அப்பெண்களும் இளைஞர்களும்
 அதிசயமாகவும் கேலியாகவும் பார்க்கிறார்கள்.
 குல்லாவை எடுத்து சட்டைப்பைக்குள் வைத்துக்கொண்டு 
போனில் தகவல் சொன்ன ரேஷ்மாபாயைத் தேடுகிறார்கள்.
சீவ்ரி அரசு மருத்துவமனையில் தன் கடைசி நாட்களை
 எண்ணிக்கொண்டிருக்கும் தேசப்பிதாவின் மூத்தமகன்..
வாசிக்க வாசிக்க தேசப்பிதா தன் மூத்தமகனுக்கு மட்டும் 
பிதாவாக இருக்கவில்லையே என்ற எண்ணம் பாறாங்கல்லாகி
 வாசிப்பு நிமிடங்களைக் கனமுள்ளதாக்கிவிடுகிறது.

காந்தியுடன் முரண்படும் புள்ளிகள் பலவுண்டு. 
ஆனாலும் அந்த மனுஷன் தன் வாழ்க்கையில்
 தன் அனுபவங்களின் ஊடாக தன்னையே வருத்திக்கொண்டு...
காந்தி மகாத்மாவாகவே இருக்க ஒரு மனைவியாக கஸ்தூர்பாவும் 
ஒரு மகனாக ஹரிலாலும் கொடுத்த விலை அதிகம் தான்.
 மகாத்மாக்களுக்கு வேண்டுமானால் அதெல்லாம்
 பெரிதாக இல்லாமல் இருக்கலாம்.
ஆனால் என்னைப் போன்ற சாதாரண மனுசிக்கு.. அப்படியல்ல.

புத்தக அலைவரிசை: THE SECRET DIARY OF KASTURBA - BY
Neelima Dalmia Adhar
&MAHATMA VS GANDHI - by Dinkar JOSHI

கொஞ்சு புறாவே..

 . .Image result for pigeon at window
பால்கனியில் முட்டையிட்டு குஞ்சுபொறித்து
குடும்பம் நடத்திய புறாக்கள்
பறந்துவிட்டன.
ஊடலும் கூடலுமாய் வெட்டவெளிச்சத்தில்
வெட்கமின்றி திரிந்த புறாக்களை
சிபிமகாராஜாவின் நீதிமன்றம்
தண்டித்துவிட்டது..
சாலை ஓரத்தில் எச்சமிடும் நடைபாதை மனிதர்கள்
விடிவதற்கு முன்பே எழுந்துவிடுகிறார்கள்.
புறாக்களின் எச்சங்கள்
அடுக்குமாடிகளின் அழகைக் கெடுத்துவிடுகிறதாய் அறிவித்தவர்கள்..
இரும்புவலைக் கம்பிகளால் வேலிபோட்டு
பத்திரப்படுத்திக்கொண்டார்கள்..
பறக்கவோ இருக்கவோ
புறாக்களுக்கு அனுமதியில்லை.
இனி, காடுகளை இழந்த ஆதிவாசிகளைப் போல
புறாக்கள் அலைந்து கொண்டிருக்குமோ?.
புழுக்கமான இரவுப்பொழுதில் சன்னல்கதவுகளைத் திறக்கிறேன்.
புறாக்கள் விட்டுச் சென்ற முத்தங்களின் வாசனை
துரத்துகிறது சாபமாய். .


Sunday, March 19, 2017

சாமிக் கொண்டாடிகளும் என் சனங்களும்


அது என்னவோ தெரியல நான் எங்க ஊருக்குப் போயிட்ட
(அதாவது நான் வாக்கப்பட்டப் போன ஊரைத்தான் சொல்றேன்)
நான் அப்படியே மாறிப்போயிடுதேன். அது என்ன மாயமோ தெரியல.
காலையில எழுந்திருச்சி  வாசப்பெருக்கி முற்றம் தெளிச்சி கோலம்
போட்டு தோட்டமெல்லாம் பெருக்கி ... அப்படியே வயக்காட்டுக்குப்
போயி மோட்டார் போடற கிணற்றில் குளியல் போட்டு துணியைத்
துவைச்சி வீட்டுக்கு வந்து அசைக்கயிற்றில் காயப்போடுவது வர..
எல்லாமே என் ஊருக்கான ஸ்பெஷாலிட்டி தான்.அப்படித்தான் எங்க
ஊரு சாமிகளும் சாமிக்கொண்டாடிகளும். நாங்க போனவுடனேயே
சாமிக்கொண்டாடி வந்து சொல்லிட்டுப் போயிடுவாரு.. கோவிலுக்குப்
பூஜை செய்யது பற்றி. ஒரு வெள்ளியோ செவ்வாயோ கோவிலையும்
கோவில் சுற்றுப்புறத்தையும் தூய்மை செய்ய ஆரம்பித்துவிடுவார்கள்.
கோவிலைச் சுற்றி வளர்ந்திருக்கும் முள்மரங்களை வெட்டுவது தண்ணீர்
தெளிப்பது என்று எல்லோரும் சேர்ந்து வேலை செய்வதைப் பார்க்கவே
நல்லா இருக்கும். அப்போது சூடான அரசியல் பேச்சும் நடக்கும்.
அவர்களுக்கு ஊரில் காபிக்கடை வைத்திருப்பவர் தன் சார்பாக
காபியும் வடையும் கொடுத்து கவனித்துக் கொள்வார்.
மாலையில் பூஜை ஆரம்பிக்கும். நான் நல்லபெண்ணாக எந்த
விவாதங்களும் செய்யாமல் அவர்களுடன் கலந்து நிற்பேன்.
சர்க்கரைப் பொங்கல் வைத்து பூஜை நடந்தப் பிறகு வரும் பாருங்கள்
சாமிக்கொண்டாடிக்கு அருள்... அப்படியே அவர் ஆட ஆரம்பித்து
விடுவார்.. பெண்கள் அவரிடம் நல்வாக்கு கேட்பார்கள்..

" அந்த மனுஷன் திரும்பி வருவாரா இல்ல.. அப்படியே
போயிடுவானா.."
-யாரு உன் புருஷனைதானே கேட்கே.. அவன் அங்க ஒரு தொடுப்பிலே
இருக்கான்... எப்படியும் இந்தப் பங்குனி மாதத்திற்கு பிறகு வந்திடுவான்
பாரேன்.  -

'உன்ன நல்லாதானே வச்சிருக்கோம். இப்படி தோட்டமெல்லாம்
காய்ந்து போயி கிடக்கே.. .."
சாமிக்கு இப்போது அருள் உச்சத்தை தொடும்.
"என்ன மறந்திட்டீங்க... என்ன மறந்தீட்டிங்க.."  என்பார்.
ஊரிலிருக்கும் பெரியவர் சாமியிடம் கோவித்துக் கொள்வார்.
"தோட்டமும் வயலும் செழிப்பா இருந்தா உன்ன என்ன பட்டினியா
போடுவோம்.." என்பார்.

'கிணத்திலே தண்ணி இல்ல. விதைச்சிட்டேன். மழை வருமா ..
விளையுமா சொல்லு..'
"வர்ற அமாவாசைக்கு முந்தின நாள் மழை ஆரம்பிக்கும்.
குளம் குட்டை கிணறெல்லாம் நிரம்பிடும். அம்மா சொல்லிட்டா"
இப்படியாக அவர் நல்வாக்கு சொல்ல ஒருவழியாக நாங்கள்
 எல்லோரும் சுவையான சர்க்கரைப் பொங்கலை
அங்கேயே இலைப்போட்டு சாப்பிட்டுவிட்டு வருவோம்.
 பூஜைக்கு வைத்த தேங்காய் ,பழம் , எஞ்சிய சர்க்கரைப் பொங்கல்
ஊரில் அனைவரின் வீட்டுக்கும் பகிர்ந்தளிக்கப்படும்.

அமாவாசை வரும் போகும் வரும் போகும்.
மழை ஏன் வரவில்லை என்று அவரிடம் யாரும்
 எதிர்கேள்வி கேட்பதில்லை.
அவரும் தோட்டத்திற்கு வயலுக்கும் நடையா நடந்து இளைத்து
களைத்துப் போயிருப்பார். பல வருடங்கள் இதைப் பார்த்து
என் சனங்களின் தெய்வங்களைப் புரிந்து கொள்ள ஆரம்பித்தேன்.
இந்த தெய்வங்களுக்கும்  கருவறையில் வீற்றிருக்கும்  கடவுளின்
அதிகாரத்திற்கும் சம்பந்தமே இல்லை.
 தெய்வங்கள் அவர்களில் ஒருவராக இருக்கிறார்.
அவர்களைப் போலவே அவர்களின் தெய்வங்களும் வெயிலில் வாடி
கறுத்து மழையில் நனைந்து ஒதுங்குவதற்கு மேற்கூரையின்றி
வாழ்ந்து கொண்டிருக்கிறார்.
அவர்கள் தெய்வத்துடன்  பேசுகிறார்கள்
 கோவித்துக் கொள்கிறார்கள்
சண்டைப் போடுகிறார்கள். ஏன் அவர் அவர்களுடன் சேர்ந்து
சாராயம் வேறு குடிக்கிறார்
.இப்படியாக வாழ்ந்த சாமிக்கொண்டாடிகள்  பலரில்
நல்வாக்கு கேட்டிருக்கிறேன். சென்ற ஆண்டு சாமிக்கொண்டாடி
போய்ச்சேர்ந்தப் பிறகு ஊரிலிருந்து சங்கருக்கு அடிக்கடி போன்
வருகிறது
. " அண்ணே.. நம்ம ஊர்ல சாமியாட இப்போ யாருமில்லைன்ணே"
என்று. என் சனங்களின் கவலை நியாயமானதுதான்.

Saturday, March 18, 2017

மொழிக்கொள்கை




கர்நாடக முதல்வர் சித்தராமையா அவர்கள் கர்நாடகவில் பணிபுரியும் அரசு அதிகாரிகள் அனைவரும் கன்னட மொழி கற்றிருக்க வேண்டும் என்று அறிவித்திருக்கிறார்.
மொழிவாரியாக மாநிலங்கள் பிரிக்கப்பட்ட போதே ஒவ்வொரு மாநில மொழிக்கும் சம அந்தஸ்த்து என்றே சொல்லப்பட்டது.
நடைமுறை வேறாக இருந்தாலும்.

இந்த அறிவிப்புக்குப் பின் ஊடகங்களில் திடீரென இக்கருத்து
 பேசு பொருளாகி இருப்பது வரவேற்புக்குரியதுதான்.
ஆனால் இதைப் பற்றி பேசுபவர்களும் கருத்துரைப்பவர்களும்
 நடைமுறை சிக்கல் என்ன என்பதை ஏன் பேச மறுக்கிறார்கள்
 என்பதுதான் எனக்குப் புரியவில்லை.
 தேசத்துரோகி மாதிரி இனத்துரோகி என்ற பட்டம்
 கொடுத்துவிடுவார்களோ என்ற அச்சம் கூட காரணமாக
 இருக்கலாம். இதை எழுதுவதற்கு முன் நானும்
முன்னெச்சரிக்கையாக இரண்டு வரிகள்
 எழுத வேண்டும்.நான் தாய்மொழிக் கல்விக்கு
 எதிரானவள் அல்ல . எங்கள் வீட்டில் என் தந்தையார்
 எங்கள் அனைவரையும் தமிழ்வழிக் கல்வி கற்கவே
 ஏற்பாடு செய்தார்
 (அவர் தொண்டர் என்பதுகூட காரணமாக இருக்கலாம்!)

நடைமுறை சிக்கல்கள் :
The allocation of cadre officers to the various cadres shall be made by the Central
 Government in consultation with the State Government of the State Government concerned.
 The Central Government may, with the concurrence of the State Government
 concerned, transfer a cadre officer from one cadre to another cadre".
இதுதான் இந்த அரசு அலுவலர்கள் குறித்த இந்தியச் சட்டம்.
 All India Service Officers(IAS/IPS/IFoS) and other Central Government Group A Officers(IFS, IRS, IAAS, IRTS etc) பதவிகள் இந்திய நடுவண் அரசு நியமிக்கும் பதவிகள். இது வெள்ளைக்காரன் இந்தியாவை ஆண்டபோது பரந்துபட்ட இந்தியாவின் ஆட்சி நிர்வாகத்தை தன் கட்டுப்பாட்டுக்குள் வைத்திருப்பதற்காக உருவாக்கப்பட்ட பதவிகள். காலனி ஆத்கத்தின் நிர்வாக முறை வசதிக்கான பதவிகள்.
இப்பதவிகள் குறித்த சட்டதிட்டங்கள் எதுவும் இந்தியக்குடியரசான பிறகும்
மிகப்பெரிய அளவிலான மாற்றங்கள் எதுவும் அடையவில்லை என்பதையும்
எண்ணிப்பார்க்க வேண்டும்..

எனவே இந்தியக் குடியரசு  அயல்மாநிலத்தவர் பணி புரிய வரும்போது சில விதிமுறைகளை அமுல்படுத்தி இருக்கிறது. அதாவது அயல்மாநிலத்தவர் தான் பணி செய்யும் மாநிலத்தின் மொழியை 6 மாதத்திற்குள் கற்றுக்கொள்ள வேண்டும்.
 அதற்கான பயிற்சி, உதவித்தொகை, நேரம் இத்தியாதி
எல்லாம் கூட ஒதுக்கப்படுகின்றன. ஆனால் நடைமுறையில்
 பிற மாநிலத்தவர் இன்னொரு மாநில மொழியை ஒரு கோப்புகளை வாசிக்கும் அளவுக்கு கற்றுக்கொள்கிறார்களா? அது எந்தளவுக்கு சாத்தியப்படும் ? என்பதையே நாம் சிந்திக்க வேண்டும்.
உதாரணத்திற்கு,
.  ஒரு தமிழர் மராட்டிய மாநில ஐஏஎஸ் அதிகாரியாக பணிபுரிகிறார்.மாநில மொழிக்கொள்கை படி அவர் மராட்டி மொழியைக் கற்க வேண்டும். சரி.. ஐஏஎஸ் படிச்சவருக்கு இன்னொரு மொழி கற்பது ஒன்றும் கடினமில்லை என்று வைத்துக்கொள்வோம். அவர் பஞ்சாப் மாநிலத்திற்கு மாற்றலாகிப் போகிறார்.பஞ்சாபி கற்கவேண்டும்.!!
இப்படிப் பேச ஆரம்பித்தால் உடனே நடுவண் அரசு சொல்லுவார்கள்.. அதனால் தான் சொல்லுகிறோம் இந்தியாவின் தேசியமொழியாக இந்தி இருக்க வேண்டும் என்று.
இதுவும் இந்தி மொழி திணிப்பு என்ற  கட்டாய மொழித்திணிப்பின் இன்னொரு
வடிவமாகவே இருக்கும்.
அதுவும் சரியல்ல. அப்படியானல் என்ன செய்ய வேண்டும்?
கட்டாய மொழித்திணிப்பு, இந்தியாவின் இறையாண்மை, இந்திய தேசத்தில் வாழும் பல்வேறு (தேச )இன மக்களின் இறையாண்மை அனைத்தையும் கணக்கில் கொண்டு தீர்வு காண வேண்டிய காலம் வந்துவிட்டது. அதனால் தான் இதை அரசியலாக்கி ஓட்டுக்கான விலையாக்கிவிடக்கூடாது என்று கருதுகிறேன்
இப்பிரச்சனையைக் கையில் எடுத்துக்கொண்டு அரசியல் செய்வதை முதலில் விட வேண்டும். இது குறிதது இந்திய மொழி அறிஞ்ர்களும் கல்வியாளர்களும் இணைந்துதீர்வு காணவேண்டும்

1.