Monday, December 11, 2017

FINANCIAL RESOLUTION AND DEPOSIT INSURANCE BILL 2017

Image may contain: text
நிதி தீர்வு மற்றும் சேமிப்பு காப்பீடு மசோதா
FINANCIAL RESOLUTION & DEPOSIT INSURANCE BILLS 2017
யாருக்காக இந்த மசோதா,,?
மாண்புமிகு கனவான் ஜெட்லி அவர்களுக்கு...
நீங்கள் எங்கள் வங்கி சேமிப்புக்கு பாதகம் வராது 
என்று உறுதியளிக்கிறீர்கள். நாங்களும் நம்பத் தயாராக இருக்கிறோம்.
இப்போ.. சின்னதா ஒரே ஒரு டவுட்..ப்ளீஸ் ஜெட்லி..
இப்போ இந்த மசோதாவுக்கான அவசியம் என்ன?
நீங்க உங்க கட்சிகளுக்கு பணத்தை அள்ளிக்கொடுக்கும் 
கார்ப்பரேட்களுக்கு கடனாக எங்கள் பணத்தை அள்ளிக் 
கொடுப்பீர்கள். அப்புறம் பேங்க் திவாலாவாகப்
போகிறது என்று பயமுறுத்துவீர்கள், 
அதற்காகத்தான் UK, USA நாடுகளைப் போல
இந்தியாவிலும் சட்டம் கொண்டுவரப் போவதாக சொல்லுவீர்கள்.

ஏன்யா.. மல்லையாவை இந்திய நீதிமன்றத்தில்
 கொண்டு நிறுத்தமுடியாத நீங்கள்.. 
யாருக்காக இந்த மசோதாவைக் கொண்டு வருகிறீர்கள்?
வங்கிகளில் கடன் வாங்கிவிட்டு அதைத் திருப்பிக் 
கொடுக்காத அத்தனைப் பேரின் பெயர், நிறுவனம், 
சொத்து மதிப்பை இன்றுவரை வெளியிட முடியாமல்
 எது உங்களைத் தடுத்து வைத்திருக்கிறது?
deposit holders do not have any superior claims 
என்று சொல்லும் உங்கள் மசோதாவின் வரிகளுக்கு 
என்ன அர்த்தம்? வங்கிகள் சேமிப்புதாரர்களின்
பணத்தைக் திருப்பி கொடுத்துதான் ஆகவேண்டும்
 என்று கட்டாயப்படுத்தமுடியாதுனு
சொன்னா அதை எப்படி எங்கள் சேமிப்புகளுக்கான
 உங்கள் பாதுகாப்பு திட்டம்னு ஏற்றுக்கொள்ளமுடியும்! 
இப்படி ஒரு மசோதா நிறைவேற்றி இச்சட்டத்தில்
 தலையிட உச்சநீதிமன்றத்திற்கோ
அல்லது ரிசர்வ் வங்கிக்கோ கூட அதிகாரமில்லை
 என்று நீங்கள் வரையறுக்கும் போது.....
ஜெட்லி.. 
ஓய்வூதியம் பெறுபவர்களுக்கும் 
ஐந்தும் பத்துமாக வங்கியில் சேமித்திருக்கும் எங்களுக்கும் 
இந்திய திருநாட்டில்
ஓட்டு போடும் உரிமை இருக்கிறது
 என்பதை மறந்துவிடாதீர்கள்.!

Sunday, December 10, 2017

ONE MP ONE IDEA

ONE MP , ONE IDEA
Image result for திருச்சி சிவா
ஒவ்வொரு நாடாளுமன்ற உறுப்பினரும் அவர் தொகுதி வளர்ச்சிக்கு ஒதுக்கப்பட்டிருக்கும் ரூ 5 கோடியிலிருந்து பல்வேறு நலத்திட்டங்களைச்
 செய்வதற்கு வழிமுறைகள் இருக்கின்றன. 
தொடர்ந்து பல ஆண்டுகள் நாடாளுமன்ற உறுப்பினராக இருக்கும்
 தோழர் திருச்சி சிவா அவர்கள் அண்மையில் வெளியிட்டிருக்கும் 
இச்செய்தி என் கவனத்திற்கு வந்தது. 
பெரும்பாலும் இதை யாரும் அக்கறையுடன் வாசிப்பதில்லை என்று அவரே ஒத்துக்கொண்ட பிறகு அது குறித்த என் விமர்சனத்தை விலக்கி வைத்துவிட்டு தோழரின் 
வாட்ஸ் அப் செய்தியை மட்டும் பகிர்ந்திருக்கிறேன்.
தோழருக்கு என் அன்பும் வாழ்த்துகளும்.
இது குறித்த விவரங்கள் அறிய :
http://innovationcouncilarchive.nic.in/index.php…
இப்படியான நிதி ஒதுக்கீடுகள் இருக்கின்றன என்பதை 
அனைவருக்கும் அறியத்தருவதற்கும்
ஒவ்வொரு தொகுதி நாடாளுமன்ற உறுப்பினரும்
 இதைச் செய்ய முடியும், செய்ய வேண்டும்
என்ற கோரிக்கையை ! (உரிமையை) வைக்கவும்
 இப்பகிர்வு ஒரு தூண்டுதலாக இருக்கும்
என்ற நோக்கத்தில் ..
திருச்சி சிவா அனுப்பி இருக்கும் செய்தியிலிருந்து ...
நாடாளுமன்ற உறுப்பினர்கள் தங்களுடைய தொகுதி வளர்ச்சி
 நிதியினை எந்தெந்த வகையில், என்னென்ன காரியங்களுக்காக
 ஒதுக்கீடு செய்யலாம் என்று வழிகாட்டும் நெறிமுறைகள்
 அடங்கிய கையேடு ஒன்றினை மத்திய அரசின்
 “ திட்டம் மற்றும் புள்ளிவிவரங்கள் “ அமைச்சகம் உருவாக்கி தந்துள்ளது.
பெரும்பாலும் இதனை யாரும் அவ்வளவு அக்கறையோடு 
முழுவதுமாகப் படித்து பார்ப்பதில்லை . ஒருநாள் இதில் எழுந்த
 ஐயம் காரணமாக படித்தபொழுது ஒரு நல்ல திட்டம் என்னை கவர்ந்தது.
 “ One MP-One idea” என்பது அதன் பெயர். இந்த திட்டத்தின் கீழ் 
ஒரு நாடாளுமன்ற உறுப்பினர் ஐந்து இலட்ச ரூபாய் ஒதுக்கீடு செய்யலாம்.
நாட்டில் தீராத பிரச்சனையாக , தீர்க்கப்படவேண்டியதாக
 எல்லோரும் கருதுகின்ற ஒரு பிரசனைக்கு, 
உதாரணமாக் குறைந்து வரும் நிலத்தடி நீர், மணல் பிரச்னை, 
புவி வெப்பமடைதல், பெருகிவரும் மக்கள்தொகை, 
பிளாஸ்டிக் கழிவுகளின் பாதகங்கள் , சுருங்கி வரும் விவசாயம்
, நீர் நிலைகள் , போக்குவரத்து நெரிசல், சாயப்பட்டறைக் கழிவுகள், 
சுற்றுச்சூழல் மாசு, எரிபொருள் மாற்று, கல்வி தரத்தில் மேம்பாடு,
 மாணவர்களின் மனநிலையில் மாற்றம் , வேலையில்லா திண்டாட்டம்
 எனும் இப்படிப்பட்ட பல்வேறு பின்னடைவுகளுக்கு காரணமானவைகளை களைவதற்கு, சீர்படுத்துவதற்கு ஆக்கபூர்வமான, ஏற்றுப்பின்பற்றத்தக்க, நடைமுறைப்படுத்தக்கூடிய தீர்வினை ஏதாவது ஒரு பிரச்சனைக்கு 
தமிழ்நாட்டின் எந்த ஒரு பகுதியிலும் வாழ்கின்ற இளைஞர்கள், 
மாணவர்கள் என யார் வேண்டுமென்றாலும் திட்ட வடிவில் தந்திடலாம்.
பெற இருக்கின்ற இந்த யோசனைகளை வல்லுனர் குழு ஒன்று 
பரிசீலித்து பரிசுகளும், சான்றிதழும் மத்திய அரசின் சார்பில் வழங்கப்படும்.
முதல் பரிசு: ரூபாய் இரண்டரை இலட்சம்
இரண்டாம் பரிசு: ஒன்றரை இலட்சம் ரூபாய்
மூன்றாம் பரிசு: ஒரு இலட்சம் ரூபாய்
இதற்கான நிதி என்னுடைய நாடாளுமன்ற தொகுதி 
வளர்ச்சி நிதியிலிருந்து ஒதுக்கீடு செய்யப்பட்டுவிட்டது.
 உங்கள் யோசனைகளை அனுப்ப வேண்டிய முகவரி:
திட்ட அலுவலர்,
மாவட்ட ஊரக வளர்ச்சி முகமை,
ஆட்சித் தலைவரகம், திருச்சி,
மின்னஞ்சல்: drdatry@nic.in
குறிப்பு: இது என் கண்டுபிடிப்பு அல்ல,, இருந்ததைக் கண்டறிந்து 
நான் தொடங்கி வைத்திருக்கிறேன். கொலம்பஸ் மாதிரி
. அவ்வளவே. எனக்குத் தேவை சமுதாயத்தை அச்சுறுத்தும்
 பிரச்சனைகளுக்குத் தீர்வு.காத்திருக்கிறோம்
 உங்கள் அரிய ஆலோசனைகளை எதிர்நோக்கி!
அனுப்புவதற்கு கடைசி நாள்: : 31-12-2017
அன்புடன் திருச்சி சிவா.

Friday, December 8, 2017

உறைபனி

Image result for depressed woman modern art

உறைபனியில் மரத்துப் போயிருக்கும்
உணர்வுகளை
முகத்தில் அறைந்து எழுப்பிக் கொண்டிருக்கிறது
நீ விட்டுச் சென்ற மவுனம்.
இலைகளை உதிர்த்துவிட்ட கிளைகள்
இளைப்பாறுகின்றன.
பாறைகளுக்குள் தன்னைத் தேடி
பயணித்துக் கொண்டிருக்கிறது
நீ அறியாத வேர்கள். 
விடியலுக்கு முந்திய உடல்கள் 
காமத்தைத் தின்று
பசியாற்றிக் கொள்கின்றன.
சாலையோரத்தில் செம்மொழி 
கிழிந்தப் போர்வைக்குள்
உறங்கிக்கொண்டிருக்கிறது.
சக்கரங்களின் பல்லிடுக்குகளில்
நினைவுகள் தற்கொலை செய்துகொள்கின்றன.
மெல்ல களைகிறது வேஷம்.

Saturday, December 2, 2017

ஹார்வர்ட் பல்கலை கழகத்தில் தமிழ் இருக்கை தேவைதானா?



ஹார்வர்ட் பல்கலை கழகத்தில் தமிழ் கல்விக்கான இருக்கை
...தேவையா தேவையில்லையா என்ற விவாதங்களுக்குள்
 நான் வர விரும்பவில்லை.
அதெல்லாம் தமிழின தமிழ் மொழிக் காவலர்கள் என்று சொல்லிக் கொள்பவர்கள் பார்த்துக் கொள்ளட்டும்.
என்னைப் போன்ற ரொம்பவும் சாமனியமானவர்களுக்கு
சில ஐயப்பாடுகள் இருக்கின்றன.
1 ஏற்கனவே உலகில் பல்வேறு நாடுகளில்  சற்றொப்ப 15 பல்கலை
கழகங்களில் தமிழ் இருக்கை இருந்தது.  இன்று  3 பல்கலை
கழகங்களில் மட்டும் தான் தமிழ்த்துறை இருக்கிறது. மீதி 12 பல்கலை கழகங்களில் தமிழ்த்துறைகள் ஏன் மூடப்பட்டன?
அதிலும் குறிப்பாக ஜப்பான், ரஷ்யா போன்ற நாடுகளில் ஏற்படுத்தப்பட்ட தமிழ்த்துறை மூடப்பட்டதைப் பற்றி எவருக்கும் ஏன் அக்கறையோ கவலையோ ஏற்படவில்லை.!!
 அப்படி ஹார்வர்ட் பல்கலை கழகத்திலும் மூடுவிழா நடக்காது
 என்பதற்கு என்ன உத்திரவாதம்  இருக்கிறது?
2) செம்மொழி தமிழாய்வு நிறுவனம் ஒதுக்கிய நிதியில் 85 கோடி ரூபாயை பயன்படுத்தாமல் விட்டதால் அத்தொகை தமிழாய்வுக்கு வராமல் முடங்கிவிட்டது. இனி வரும் ஆண்டுகளிலும்
அத்தொகையைப் பெறுவதற்கான வழிகள் சட்டப்படி இருப்பதாக தெரியவில்லை.
மத்திய அரசு ஒதுக்கிய பணத்தில் 85 கோடியை இப்படி
 கைநழுவ விட்ட தமிழக அரசும் செம்மொழி நிறுவனமும்
 அப்பணத்தை முறையாக பெற்று தமிழ்க் கல்விக்காகவும்
தமிழ் மொழி வளர்ச்சிக்காகவும் என்னவெல்லாம்
செய்திருக்க முடியும்! ஏன் செய்யவில்லை?
3) அறிஞர் அண்ணா முதல்வராக இருந்த காலத்தில் திருக்குறள் பீடம்
 என்ற  தமிழ் இருக்கையை சிதம்பரம், மதுரை, சென்னை பல்கலை கழகங்களில் உருவாக்கினார். அண்ணாவின் மறைவுக்குப்
பின் சிதம்பரத்தில் திருக்குறள் பீடம் காணமல் போய்விட்டது.
 செம்மொழி ஆய்வு நிறுவனமோ
ஏற்கனவே உருவாக்கிய திருக்குறள் பீடத்தை புதுப்பிக்காமல்
 கவனிக்காமல் புதிதாக இன்னொரு
திருக்குறள் இருக்கையை ஒரு கோடி ரூபாய் திட்டத்தில் துவங்கினார்கள். திருக்குறள் இருக்கையை வைத்துக் கொண்டு கூட இவ்வளவு "அரசியல் " செய்த அவலத்தை நாம் எவருமே கேள்விக்குட்படுத்தவோ
விமர்சிக்கவோ இல்லை!
4) இந்தியாவில் தமிழகம் தவிர எத்தனை அயல்மாநிலங்களின் பல்கலை கழகங்களில் தமிழ்த்துறை இருக்கிறது? அப்படியே இருந்தாலும் அவற்றின் இன்றைய நிலை என்ன?
5) ஹார்வர்ட் பல்கலை கழகத்தில் இப்போதும் ஆரம்பநிலை, இடைநிலை, உயர்நிலை என்று மூன்று நிலைகளில் தமிழ் கற்பிக்கப்படுகிறது. என்று சொல்கிறார்களே,
ஹார்வார்ட் பல்கலை கழகத்தில் தமிழே இல்லை என்பது போல ஒரு தோற்றத்தை ஏன் உருவாக்கி இருக்கிறார்கள்? இதில் எது உண்மை?
6) தமிழ்நாட்டின் பல்கலை கழகங்களில் தமிழ்த்துறைக்கான இடம் என்ன? எத்தனை மாணவர்கள் அதில் படிக்கிறார்கள்? தமிழ்நாட்டின் பல்கலை கழக தமிழ் இருக்கைகளுக்கு அரசு ஒதுக்கி இருக்கும் நிதி எவ்வளவு? அதை எப்படி பயன்படுத்தி இருக்கிறார்கள்?
இதுவரை வெளிவந்த ஆக்கப்பூர்வமான புத்தகங்கள், செயல்பாடுகள் என்ன?

ஒரு மொழியை ஹார்வர்ட் பல்கலை கழகம் போன்ற பெருமைமிகு
பல்கலை கழகம் தானே விரும்பி அதற்கான் இருக்கையை உருவாக்க
அந்த மொழி பேசும் மக்கள் என்ன செய்ய வேண்டும்? எம்மாதிரியான
கட்டமைப்பை உலக அரங்கில் உருவாக்க வேண்டும்? தேவை என்று
வந்து விட்டால் உலகில் எந்த ஒரு மூலையிலும் தமிழுக்கான இருக்கை
தானே உருவாகும், அதற்கான சூழலை உருவாக்குவதில் தமிழினமும்
தமிழக அரசும் தொலை நோக்குப் பார்வையுடன் கவனம் செலுத்தினால்
நல்லது.
இக்கேள்விகள் ஹார்வர்ட் தமிழ் இருக்கைக்கு எதிரானவை அல்ல
சொந்த ஊரில் சொந்தநாட்டில் தமிழ் மொழிக்கான இருக்கையை
உறுதி செய்து கொள்ளும் சாமானிய தமிழனின் கேள்விகள்.

Friday, December 1, 2017

மும்பையில் ஊடறு பெண்ணிய உரையாடல்கள்

மும்பை ஊடறு சந்திப்பின் உரையாடல்கள்
---------------------------------------------------------------------------
" தாம்பத்திய உறவுக்கான இடமோ வசதியோ இல்லாத
 இருப்பிடத்தில் வாழ்வதால் குழந்தைகள் பாதிக்கப்படுவதும்.......".





ஊடறு பெண்கள் சந்திப்பு இந்தியாவின் பெருநகரமான 
மும்பையில் 2017 நவம்பர் மாதம் 25, 26 காரிக்கிழமை,
 ஞாயிற்றுகிழமை இருநாட்கள் நிகழ்வாக நடைபெற்றது.
 தமிழகம் அல்லாத அயல்மாநிலத்தில் இந்நிகழ்வை நடத்துவதில்
இருந்த நடைமுறை சிக்கல்களையும் தாண்டி
 இந்நிகழ்வு நடைபெற்றது.
முதல்நாள் நிகழ்வு : சனிக்கிழமை 25/11/17
காலை 10.30 மணி அளவில் பாண்டூப் மேற்கு பகுதி 
பிரைட் உயர்நிலைப்பள்ளி திருவள்ளுவர் அரங்கில் சந்தித்தோம். 
நிகழ்வை எம் வேண்டுகோளை ஏற்றுக்கொண்டு
ஸ்பேரோ பெண்கள் ஆய்வு நிறுவனத்தின் தலைவர்
 எழுத்தாளர் அம்பை அவர்கள் தொடங்கி வைத்து நிகழ்வை நடத்தினார்.
மோனோபஸ் , பெண்ணுடல் அடையும் மாற்றங்கள், 
பெண் பூப்படையும் வயது, அதுசார்ந்த புரிதல்கள், நம்பிக்கைகள்
 மற்றும் குடும்பத்திலும் குடும்பத்தை சுற்றியும் பெண் அனுபவிக்கும்
 பாலியல் வன்கொடுமைகள், தொந்தரவுகள்.......சீண்டல்கள் ..
 என்று உரையாடல்கள் விரிந்தன.
உரையாடல்களின் தொடர்ச்சியாக
உரையாடல்களில் கலந்து கொண்டவர்களின் தனிப்பட்ட
 பெயர்களையோ அடையாளங்களையோ பதிவு செய்வதில்லை
 என்ற அறநிலையைக் கடைப்பிடிப்பதில் ஊடறு தெளிவாக
 இருந்தது குறிப்பிடத்தக்கது. எனவே பதிவு செய்யும் காமிரக்கள்
மவுனித்தன. கட்டுடைக்க முயன்ற உரையாடல்களின்
 மூலமாக சில உண்மைகள் வெளிவந்தன. அவை:

1) பூப்படைதல் குறித்து குடும்பத்தில் தாயோ மற்றவர்களொ
 பெண்ணுக்கு அறிவுறுத்துவது அரிதாக இருப்பது தெரிகிறது. 
அக்கா . சித்தி. அத்தை என்று குடும்பத்தில்
மூத்த பெண்கள் இருந்தால் அவர்கள் மூலமே ஒவ்வொரு 
பெண்ணும் பூப்படைதல் குறித்த தகவலை அறிந்திருக்கிறாள்.

2) பூப்படைதல் நிகழ்வில் இலங்கை, தமிழகம் 
மற்றும் மராட்டிய மாநிலத்தின் சடங்குகளும்
நம்பிக்கைகளும் பொதுவாகவே இருக்கின்றன.

3) இரத்தப்போக்கு குறித்து எதுவுமே அறியாமலும்
 உடலுறுப்புகளின் இயற்கையான செயல்பாடுகளை
 அறியாமலும் பெண்கள் இருப்பது தெரியவந்துள்ளது.

4) குழந்தைப் பேறடைந்தப் பெண்களுக்கும் கூட
 பிரசவத்திற்கு முன், வயிற்றிலிருக்கும் குழந்தை
 எப்படி வெளியில் வரும் என்ற அறிதலோ
புரிதலோ இல்லை என்பதும் அதிர்ச்சியாக இருந்தது.

5) பள்ளிக்கூடங்களில் இதுகுறித்த உரையாடல்களோ
 ஆசிரியர்களின் அறிவுறுத்தல்களொ இல்லை , 
அதிலும் குறிப்பாக நடுத்தர வர்க்கம், கீழ்த்தட்டு மக்களின் குழந்தைகள்
கல்வி கற்கும் பள்ளிகளில் இவை எதுவுமே பேசுப்பொருளாக
 இருப்பதில்லை,
அதற்கான அவசியத்தையும் அவர்கள் அறிந்திருக்கவில்லை 
என்பதையும் அறியமுடிந்தது. 

6) குடும்பத்தில் நிகழும் பாலியல் வன்கொடுமைகள்
 குறித்து இப்போதும் பெண்கள் வெளிப்படையாக 
பேசுவதற்கு தயக்கம் காட்டினார்கள்.
 குடும்ப நிறுவனத்தின் கட்டமைப்பை வெளிப்படையான
 இம்மாதிரி உரையாடல்கள் சிதைவு படுத்தும்
என்பதே அவர்களின் கருத்தாக இருந்தது.

7) ஒரு சிலர் தனக்குத் தெரிந்தவர், உறவினர் வாழ்க்கையில்
 நிகழ்ந்த சம்பவங்கள் என்று
மூன்றாமிடத்தில் படர்க்கை நிலையில் நின்று பேச முன்வந்ததார்கள்.

8) தந்தையால் பாலியல் வல்லாங்கு செய்யப்பட்ட
 பெண் தனிப்பட்ட முறையில் அதைப்பற்றி தனிப்பட்ட முறையில்
பேசியதும் அவளே எழுத்தில் தன் தந்தையைப் பற்றி 
பதிவு செய்யும் போது தந்தையின்
தலைமையைக் கொண்டாடும் வகையில் பதிவு செய்திருந்ததையும் 
எழுத்தாளர் அம்பை அவர்கள் குறிப்பிட்டார்.

9) பெண் குழந்தைகள் மட்டுமின்றி ஆண் குழந்தைகள்
 சிறுவர்களும் பாலியல் கொடுமைகளுக்கு ஆளாவதைக் குறித்து
 சில தாய்மார்கள் வெளிப்படையாக பேசினார்கள்.
10) சிறுவன் ஒருவன் நடுத்தர வயது பெண்ணின் மார்பகங்களைத் 
தொடுவதும் கூட நிகழ்கிறது , இச்சிறுவர்களை எப்படி கையாளுவது
 என்பது குறித்து சமூக அக்கறையுடனும் எதிர்காலம்
குறித்த கவலையுடனும் அவர்கள் உரையாடினார்கள்.

11) பெரும்பாலும் இன்றைய இணையதள வசதிகள் காரணமாக 
அவர்கள் பார்க்கும் காட்சிகளும் தந்தைமார்களின் 
கைபேசிகளில் அவர்கள் கண்ட காட்சிகளும் கூட
அவர்களின் இம்மாதிரியான வயதுக்கு மீறிய பாலியல்
 செயல்பாடுகளுக்கு பெரும் காரணமாக இருப்பது தெரியவந்துள்ளது.

12) மும்பை போன்ற பெருநகர வாழ்க்கையின் இருப்பிடமும்
  (10க்கு 8 அடி சதுர வீட்டில்)
இதற்கான ஒரு காரணமாகவே இருக்கிறது.
 கணவன் மனைவியின் தாம்பத்ய உறவுக்கான இடமோ 
வசதியோ இல்லாத இருப்பிடத்தில் வாழ்வதால்
 குழந்தைகள் பாதிக்கப்படுவதும் இம்மாதிரி செயல்களைச்
செய்யும் உணர்வுக்கு உந்தப்படுவதும் நடக்கிறது என்பதையும்
 பெண்கள் வெளிப்படையாக ஒத்துக் கொண்டார்கள்.

13) GST வரிவிதிப்புக்குப் பின் பெண்கள் மாதவிடாய்
 காலங்களில் பயன்படுத்தும் நேப்கின்களுக்கு விதிக்கப்பட்டிருக்கும் 
வரியைக் குறைகக்வோ / நீக்கவோ முடியாது
என்பதற்கு ஆட்சியாளர்கள் சொன்ன காரணங்கள் 
: ஒரு பெண்ணுக்கு ஒரு மாதத்தில்
அந்த 3 நாட்களுக்கு 3 அல்லது 4 நேப்கின்கள் மட்டும் தானே தேவைப்படும்!" என்ற
அவர்களின் மறுமொழி. 
இந்த மறுமொழியின் வாசிப்பில் குடும்பத்தில் ஒருவனாக
இருக்கும் ஆணுக்கு பெண்ணுடல் சார்ந்த புரிதல் எந்தளவுக்கு இருக்கிறது
 என்பதைக் காட்டுகிறதா அல்லது ஆட்சியாளர்கள் பெண்ணுடல் சார்ந்த அக்கறையின்மையை வெளிபப்டுத்துகிறதா என்ற கேள்வி எழுந்தது.

14) இந்தியப் பெண்களைக் குறித்து ஆய்வுசெய்த யுனிசெப் நிறுவனத்தின் ஆய்வறிக்கையை பெருநகரப் பெண்களின் இவ்வுரையாடல்கள்
 மீண்டும் மீண்டும் உறுதி செய்திருக்கின்றன.
, research by Unicef India in Bihar and Jharkhand found that while 85% of girls were using cloth as a menstrual absorbent, 65% knew what sanitary pads were, because they had seen ads for them on TV. Their reasons for avoiding them range from lack of money to not knowing how to use them. Ignorance about periods in general is definitely shocking: 83% of girls in the same Unicef study had no idea what to expect when they started bleeding, and nearly half missed school because of menstruation.(guardian may 2016)
15) . தொண்டு நிறுவனங்கள் எவ்வளவுதான் குடிசைப்பகுதிகளிலும் ஆதிவாசிகள் இருப்பிடங்களிலும் அடிப்படை வசதிகளைச் செய்து கொடுத்தாலும் குடிநீர் இணைப்பு, மின்சாரம் போன்ற வசதிகளைப் பெறுவதற்கு
அரசின் உதவி கட்டாயம் தேவைப்படுவதை தன் களப்பணி அனுபவத்தின் ஊடாக
தெளிவாக எடுத்துரைத்தார் நங்கை குமணன்.

16)மக்கள் தொகையில் சரிபாதிக்கும் மேலாக இருக்கும் பெண்கள் சார்ந்த நலத்திட்டங்களில் அரசின் மெத்தனமும் கவனக்குறைவும்
 தொடர்வதையும் அரசு அதிகாரத்திலிருக்கும்
எவருக்கும் பெண்கள் சார்ந்த இப்பிரச்சனைகள் குறித்து
 எந்த அளவுக்கு புரிதலும் விழிப்புணர்வும் இருக்கிறது 
என்பதையும் எழுத்தாளர் அம்பை நிகழ்வின் முடிவில்
தன் முத்தாய்ப்பான கருத்தாக முன்வைத்தார்.
மதிய உணவுக்குப் பின் ஸ்பேரோவின் "தேகம் " ஆவணப்படம் 
திரையிடப்பட்டது.

திருநங்கைகள் குறித்த இந்த ஆவணப்படம் திருநங்கைகளின்
 மனக்குமுறலை மட்டுமின்றி அவர்களின் போராட்டமே 
வாழ்க்கையாக தொடரும் கதையை
அவர்களின் மொழியில் பேசியது.
உடல் வேறு, உணர்வுகள் வேறாக இருக்கும்
 தங்கள் வாழ்க்கையில் தம் உணர்வுகளுக்கான
உடலைப் பெற அவர்கள் எதிர்கொள்ளும் சவால்களையும் 
அதை அவர்கள் எவ்வாறு கடந்து வந்தார்கள் என்பதையும்
 இந்த ஆவணப்படம் முன்வைத்தது.
மேலும் அவர்களில் சிலர் பெண்கள் செய்யும் வேலைகளான 
பாத்திரம் துலக்குவது, கோலம் போடுவது, துணி துவைப்பது, 
தண்ணீர் எடுப்பது இத்தியாதி வேலைகள்
தமக்கு விருப்பமானதாக இருந்ததால் தாங்கள்
 பெண்ணாக உணர்ந்ததாக தெரிவித்தது
சற்று அதிர்ச்சியாக இருந்தது. 
ஆண் பெண் என்ற பால்வேறுபாடு
 இச்சமூகம் சுமத்தி இருக்கும் அவர்களின் அன்றாட வேலை சார்ந்ததல்ல, 
எந்த வேலையையும் எவரும் செய்யலாம், செய்ய வேண்டும் 
என்ற புரிதல் இல்லாமலிருப்பதைக் கவனிக்க முடிந்தது. 

ஆணுடலைப் பெண்ணுடலாக்க அவர்கள் மேற்கொள்ளும் 
அறுவைச்சிகிச்சைக் குறித்தும் பேசிய ஆவணப்படம் அதையும் தாண்டி அர்த்தநாரீஸ்வரர் தத்துவத்திற்குள் தன்னுடலைப் புகுத்தி தன்னையும் தன்னுடலையும் கொண்டாடும்  திருநங்கைகளின் இன்னொரு முகத்தையும்
 காட்டியது மி கவும் குறிப்பிடத்தக்கது.
நிகழ்வில் ஊடறு சந்திப்புக்காக வந்திருந்த பெண்களுடன் 
இந்த உரையாடலில் கலந்து கொண்ட மகிழ்ச்சி மகளிர் பேரவை,
 பிரைட் இளநிலைக்கல்லூரி மாணவியர்,
அம்பேத்கர் உயர்நிலைப் பள்ளி ஆசிரியை மற்றும் மாணவியர், 
மராத்திய எழுத்தாளர் ஆஷா காம்ப்ளே, மராத்திய பேராசிரியர் மாதவி குல்கர்னி, வழக்குரைஞர் செல்வகுமாரி, ஆசிரியை ஹேமாமாலினி, சுசிலா அய்யாபிள்ளை , திருமதி ஜெயா ஆசீர், நங்கை குமணன்,
செல்வி, புனிதா மற்றும் அனைவருக்கும் 
ஊடறு சார்பாக நன்றியும் அன்பும்.

Friday, November 17, 2017

பத்மாவதி திரைப்படம்

Image result for padmavati movieபத்மாவதி திரைப்படத்தை வெளியிடக்கூடாது என்று சொல்பவர்கள் சில காரணங்களை முன்வைத்து போராட்டம் நடத்துகிறார்கள்.
அவர்கள் முன்வைக்கும் முக்கியமான காரணங்கள்:
* இரத்தத்தால் எழுதப்பட்ட எங்கள் வீரமிகு வரலாற்றை திரித்து சிதைத்து
திரைப்படக்காட்சிகள் மூலம் கறைபடிய விட மாட்டோம்"
* சத்தீஸ்கர் அரண்மனையின் மருமகள் ஹீனாசிங் திரைப்படத்தில் 
வரும் பாடல்காட்சியைச் சுட்டிக்காட்டி
 "இரஜபுதனத்து அரசியர் எப்போதும் அடுத்தவர் முன்னிலையில்,
 அரண்மனையில் எல்லோரும் பார்க்கு ம் படி நடனம் ஆடுவதில்லை.!." 

*பத்மாவதியின் தியாகம் பேசப்படாமல் அவளின் காதல் பேசப்படுகிறது.
.அதிலும் குறிப்பாக அவள் அலாவுதீன் கில்ஜியுடன் சேர்ந்து
 காதல் டூயுட் பாடுவது போல காட்சிகள் வருவதால் எங்கள் இனப்பெண்கள் அதிருப்தியில் இருக்கிறார்கள்.
இந்து ராஜ்யத்தின் அரசி எப்படி நாடு பிடிக்க வந்த இசுலாமியனைக் காதலிக்கிற
மாதிரி படம் எடுக்கலாம்?!!
இதுதான் பத்மாவதி திரைப்படத்தை எதிர்ப்பவர்கள்
முன்வைக்கும் முக்கியமான காரணம்!
எதிர்ப்பாளர்கள் முன்வைக்கும் இந்த ஆகச்சிறந்த காரணத்தைக் 
கொஞ்சம் அலசிப் பார்ப்பதற்கு முன் சில தகவல்கள் :.
இராஜஸ்தான் மாநிலத்தில் சித்தூரின் அரசி பத்மினி / பத்மாவதி .
 வட இந்தியாவில் நாடுகளைக் கைப்பற்ற பெரும்படையுடன் 
வந்த அலாவுதீன் கில்ஜி.
வளமான குஜராத் பகுதியை போரில் வெல்ல வேண்டுமென்றால்
 வழியில் இருக்கும் சித்தூர் அரசை வெற்றி கொள்ள வேண்டும்
 என்று முடிவு செய்கிறான். பெரும்படையுடன் வந்தவனை
 ரஜபுதனத்து போர்ப்படை எப்படி எதிர்கொண்டது,
அரசி என்ன செய்தாள் என்பது தான் கதை. 

ரஜபுதனத்து அரசி பத்மாவதி இசுலாமிய அலாவுதின் கில்ஜியுடன்
 கனவில் கூட காதலிக்கும் காட்சி சினிமாவில் கிடையாது 
என்று இயக்குநர் சத்தியம் செய்கிறார்.
 இத்திரைக்கதையை இயக்கி இருக்கும்
சஞ்சய்லீலா பன்சாலி இவர் பல்வேறு பிரமாண்டமான
 திரைப்படங்களை எடுத்தவர்.
பத்மாவதி திரைப்படம் எந்தக் கோணத்தில் எடுக்கப்பட்டிருக்கிறது
 என்பது திரைப்படம் திரையரங்குகளில் வெளிவந்தப் பிறகுதான்
 சொல்லமுடியும்.
அலாவுதீன் கில்ஜி என்ற பாத்திரம் கற்பனை அல்ல.
வரலாற்றில் நிஜமான கதைப் பாத்திரம்.
ஆனால் பத்மாவதி..??
சித்தூர் அரசி பத்மாவதி கற்பனையா? நிஜமா?
படத்தை எதிர்ப்பவர்களுக்கு அவள் நிஜமான அரசி.
அலாவுதீன் படை எடுத்து சித்தூரை கைப்பற்றிவிடும் தருணத்தில்
 சித்தூரின் போர்ப்படை சகா வழியை பின்பற்றுகிறது. 
அதன்படி, ஒவ்வொரு படைவீரனும் எதிரியின்கையில்
உயிருடன் அகப்படுவதை விட தன்னால் முடிந்த அளவுக்கு 
எதிரிகளைக் கொன்றுவிட்டு அவனும் வீரமரணம் அடையும் முடிவு.
 இரஜபுதனத்து பெண்கள் ஜூஹர் என்ற உயிர்த்தியாகம் 
செய்யும் முடிவை எடுக்கிறார்கள். எதிரி கையில் அகப்பட்டு 
அவர்களின் வல்லாங்குக்கு இரையாவதை விட 
அப்பெண்கள் கூட்டம் கூட்டமாக தங்கள் குழந்தைகளுடன்
தீக்குளித்து உயிரைத் தியாகம் செய்துவிடுவார்கள்.
அப்படியான உயிர்த்தியாகம் செய்த அரசியாக ரஜபுதன வரலாற்றில்
 வாழும் பெண் பத்மாவதி.
ஆனால் பத்மாவதி பாத்திரம்  சூஃபி கவிஞர் மாலிக் முகமது ஜெயசி எழுதிய கவிதையின் கற்பனைப் பாத்திரம் என்கிறார்கள்.
பத்மாவதி கற்பனைப் பாத்திரம் என்று சொல்வதற்கோ நிஜக்கதை என்று சொல்வதற்கோ.. இரு கருத்துகளுக்கும் இடமிருக்கிறது.
ஆனால் எதிர்ப்பு கிளம்பி இருப்பது
 பத்மாவதி கற்பனையா நிஜமா என்பது குறித்தல்ல.
பத்மாவதி என்ற கதைப்பாத்திரம் திரைப்படமாக வரும்போது எப்படி காட்டப்பட்டிருக்கிறது என்பது குறித்துதான்.

நாம் கவனிக்க வேண்டியது
இம்மாதிரி எதிர்ப்புகளுக்கு உள்நோக்கம் இருக்கிறது.
அதிலும் குறிப்பாக அரசியல் நோக்கம் இருக்கிறது.
படைப்பு சுதந்திரத்திற்கு எதிரானது மட்டுமல்ல
சட்டம் ஒழுங்கை சீர்குலைக்கும் செயல் , அரசு நிர்வாகத்தை
கேலிக்குரியதாக்கும் செயல்.
ஒரு திரைப்படம் வெளிவர வேண்டுமா கூடாதா 
என்பதைத் தீர்மானிக்க ஏற்கனவே அரசு தணிக்கை துறை 
இருக்கும் போது அதை இவர்கள்
கையில் எடுத்துக் கொள்வது ஏன்? 
மகாத்மாகாந்தியைக் கொன்ற நாதுராம்கோட்சே பேசுவதாக 
ஒரு நாடகம் வெளிவந்தது.
“மை நாதுராம் கோட்சே போல்தா” 
(நான் நாதுராம் கோட்சே பேசுகிறேன்) என்ற நாடகம் மூலம் 
காந்தி கொலையை, கோட்சே பார்வையில் சங்பரிவார் கும்பல் நியாயப்படுத்தியது. அந்த நாடகத்தைத் தடை செய்ய வேண்டும் என்ற கோரிக்கை வந்தப்போது அதையும் என் போன்றவர்கள் ஏற்றுக்கொள்ளவில்லை. ஒரு நாடகம் போட்டு காந்தியின் கொலையை நியாயப்படுத்தி விட முடியுமா ? என்ற எதிர்கேள்வியை முன்வைத்தோம்.
இப்போதும் பத்மாவதி திரைப்படம் வந்துவிட்டால் ரஜபுதனத்து அரசிகளின் தியாகம் மறைக்கப்பட்டுவிடுமா? என்ற கேள்வியை மட்டுமே முன்வைக்க வேண்டி இருக்கிறது.
எழுதப்பட்ட வரலாறும் எழுதப்படாமல் மறைக்கப்பட்ட வரலாறுமாக
கறுப்பும் வெள்ளையுமாய் விரியும் காட்சிகளில்.. 
பத்மாவதி.. திரையில் வரட்டுமே

Monday, November 6, 2017

ஊடறு பெண்நிலை சந்திப்பு

ஊடறு பெண்நிலை சந்திப்பு ... மும்பையில்...
தோழமை உறவுகளுக்கு ,
வணக்கம்.
இம்மாதம் மும்பையில் பன்னாட்டு பெண்கள் கருத்தரங்கம்
 நிகழ இருக்கிறது.
சுவிட்சர்லாந்திலிருந்து செயல்படும் "ஊடறு" பெண்கள்
 அமைப்புக்காக இக்கருத்தரங்கை மும்பையில்
 ஏற்பாடு செய்திருக்கிறோம்.
சுவிட்சர்லாந்து, ஆஸ்திரேலியா, இலங்கை,
 மலேசியா நாடுகளில் இருந்தும்
இந்தியாவில் டில்லி, சென்னை, மதுரை , மும்பை நகரிலிருந்தும் எழுத்தாளர்கள், களப்பணியாளர்கள், சமூக ஆர்வலர்கள்
கலந்து கொள்கிறார்கள்.
1)காரிக்கிழமை  25-11-17 காலை 10 முதல் மாலை 5 வரை
பெண்ணிய உரையாடல்கள்
பெண்களும் திருநங்கைகளும் மட்டுமே கலந்து கொள்ளும் நிகழ்வு.

2) ஞாயிறுகிழமை 26-11-17 காலை 10 முதல் மாலை 6 வரை
பல்வேறு தலைப்புகளில் பெண்ணிய கருத்தாடல்கள்.
அனைவரும் கலந்து கொள்ளலாம்.
கருத்தரங்க தலைப்புகள் சார்ந்த விவாதங்களில் அனைவரும்
பங்கேற்கலாம்.

3) "ஈழப் பெண் போராளிகள் எழுதிய கவிதைகளின் தொகுப்பு
"பெயரிடாத நட்சத்திரங்கள்" இரண்டாம் பதிப்பு
நூல் வெளியீடும் அறிமுகக்கூட்டமும் நடைபெற இருக்கிறது.

4) கருத்தரங்க நிகழ்வை ஒட்டி பெங்களூரிலிருந்து
 புஸ்தகா அமைப்பினர் வருகை தர இருக்கிறார்கள்.
உங்களின் புத்தகங்களை  இலவசமாக மின்னூலாக்கி
உலகளாவிய வாசகர் தளத்தை உருவாக்கித் தர
 முன்வந்திருக்கிறார்கள்.
அச்சில் வெளிவந்த/ வெளிவராத உங்களின்
 தரமான படைப்புகளை யுனிக்கோட் எழுத்துருவிலோ
அல்லது புத்தகமாகவோ கொண்டுவரவும்.
இந்த வாய்ப்பினை பயன்படுத்திக் கொள்ளவும்
 உங்கள் அனைவரையும் அழைக்கிறோம்.

இக்கருத்தரங்கையும் நிகழ்வுகளையும் நடத்த எம்முடன் கைகோர்த்திருப்பவர்கள்
1) திருவள்ளுவர் மன்றம், பாண்டூப்
2) பிரைட் உயர்நிலைப் பள்ளி, பாண்டூப்
3) தமிழ் இலெமுரியா அறக்கட்டளை, மும்பை
4) தமிழர் நலக்கூட்டமைப்பு - மும்பை
5) விழித்தெழு இயக்கம் - மும்பை
6) பகுத்தறிவாளர் கழகம் - மும்பை
7) ஸ்பேரோ - மும்பை
8) மகிழ்ச்சி பெண்கள் அமைப்பு - மும்பை
9) வணக்கம் மும்பை வார இதழ் - மும்பை
10) புஸ்தகா மின்னூல் அமைப்பு - பெங்களூர்.
முறையான நிகழ்ச்சி நிரல் ... விரைவில்.

அன்புடன்,
றஞ்சி - ஆழியாள்- புதியமாதவி.



Thursday, October 26, 2017

நெற்றிக்கண்ணைக் காணவில்லை



அவனுடைய நெற்றிக்கண்ணைக் காணவில்லை.
யார் திருடி இருப்பார்கள்?
என்ன நடக்குமோ 
அச்சத்தில் பனிச்சிகரங்கள் தடுமாறுகின்றன.
எங்கே போனது நெற்றிக்கண்?
சல்லடைப் போட்டு மூவுலத்திலும் தேடிக்கொண்டிருக்கிறார்கள்
தொலைந்துப் போன நெற்றிக்கண்ணை.

நக்கீரனின் விலாசம் மறந்துப்  போனதால்
கண்ணப்பனைத் தேடி பெருநகரவாசிகள்
காட்டில் அலைந்து கொண்டிருக்கிறார்கள்.
அடர்ந்த வனத்தில் மின்னலைப் போல ஜொலிக்கும்
 பேய்மரங்களின் கிளைகளில்
ஊஞ்சலாடிக் கொண்டிருக்கும்
 யட்சிகளுக்கும் தெரியவில்லை.
கழுத்தில் படமெடுத்து ஆடிய நாகம்
நாகமணியை வெளியில் துப்பி 
புதர்களுக்குள் தேடிக்கொண்டிருக்கிறது நெற்றிக்கண்ணை.
தற்காத்தல் அறிந்த பார்வதி தேவி 
தற்கொண்டான் பேணுவதில் தவறிவிட்டதாக
கங்காதேவி குற்றம் சுமத்துகிறாள்.

எல்லைக்காவல் படையினர் பதட்டத்தில் இருக்கிறார்கள்.
எப்போது வேண்டுமானாலும் துப்பாக்கிகள் வெடிக்கலாம்.
அமைதிப் புறாக்கள் அரசியல்வாதிகளின் கூடுகளில் 
அடைக்கப்பட்டுவிட்டன.
எங்குப் பார்த்தாலும் நெற்றிக்கண் பற்றிய
பர பரப்பான செய்திகள்.
நெற்றிக்கண் எப்படி இருக்கும்?
இமைகள் உண்டா , கிடையாதா?
செம்பற்சோதியான் செக்கற்மேனி
சுடர்விழி ஆழியோ நெற்றிக்கண்?
இளம்பிறைதானோ நெற்றிக்கண்!
செம்மொழிப் புலவர்கள்
சங்க இலக்கியத்தில் நெற்றிக்கண்ணைத் தேடும் 
ஆய்வுகளைத் தொடங்கிவிட்டார்கள்.
நெற்றிக்கண் ஆணாதிக்கத்தின் அடையாளமென
பெண்ணியவாதிகள்  பேசுவது சரியா தவறாவென
நவீன இலக்கியத்தின் பிதாமகன்கள் 
சர்ச்சையில் ஈடுபட்டிருக்கிறார்கள்..
நெற்றிக்கண்ணைக் காணவில்லை.

நெற்றிக்கண் முன்  தோற்றுப்போன காமதேவன்
 கையில் கரும்புடன்
மீண்டும் களத்தில் நிற்கிறான்
இருள் வெளிச்சத்தில் ரதியின்  சிவலிங்க பூஜை
அலைகளுக்கு நடுவில் பவளப்பாறைகள் விழித்திருக்கின்றன.
மரங்கள் பூக்கின்றன.
முட்டை ஓடுகளை  உடைத்தக்  குஞ்சுகள்
இரைக்காக  சப்தமிடுகின்றன.
ஒற்றைக்கண்ணால் சரித்துப் பார்க்கும் காக்கை
வடையைத் திருடக்  காத்திருக்கிறது.
தலைவர்கள் கண்களைக்  கறுப்புக்கண்ணாடிகள்
அலங்கரிக்கின்றன.
நெற்றிக்கண்ணை எல்லோரும் மறந்துவிட்டார்கள்.
திரிகூட மலையில் லட்ச தீபங்கள்
செண்பகப்பூவின் மணம் அருவிகள் எங்கும்..
பஃறுளியைத் தேடி  பயணிக்கிறது தாமிரபரணி.
அவன் கண்கள் மெல்ல சிரிக்கின்றன..

Thursday, October 19, 2017

சாதாரணம் தான் ஆனால்..

இது சாதாரணமான நிகழ்வு தான்.
எல்லா இடங்களிலும் நடப்பது தான்.
ஆனால் இதை எல்லாம் எப்படி சாதாரணமாக
கடந்துப் போவது?

என் குடியிருப்பின் மாடிப்படிகளை அவன் தண்ணீர் விட்டு
கழுவி விட்டிருக்கிறான். சலவைக் கற்கள் பளபளக்கின்றன.
ஒவ்வொரு ஆண்டும் தீபாவளிக்கு முன் கட்டாயம்
 இப்படிக் கழுவுவது அவன் வேலை.
அடுக்குமாடிக் கட்டிடம். வேலை அதிகம் தான்
அதனாலோ என்னவோ அவன் மனைவியும்
சேர்ந்து வந்திருந்தாள்.
அது மட்டுமல்ல ஒவ்வொரு தளத்திலும் கழிவறை
வசதிகளும் உண்டு. அதையும் மறக்காமல் கழுவி
 விடுவார்கள். காலையில் ஆரம்பித்தால் பிற்பகல்
 தாண்டி மாலை வரை நீடிக்கும்.
இதோ.. சிறார்கள் பட்டாசு வெடிக்கிறார்கள்.
 தற்போது பட்டாசுகளின் அளவு குறைந்திருக்கிறது என்றாலும் வெடிக்கத்தான் செய்கிறார்கள். நாளையும் நாளை மறுநாளும்  தோட்டமெங்கும் கட்டிடத்தின் சுற்றுப்புறம் எங்கும்
 பட்டாசு வெடிகளின் கழிவுகள் சிதறிக்கிடக்கும்.
அதை அவர்கள் தான் பெருக்கி எடுக்க வேண்டும்.
அவர்களுக்கு நாங்கள்  அனைவரும்  மறக்காமல்
 தீபாவளி டிப்ஸ் கொடுத்துவிடுவோம்.
இது எல்லாம் எல்லா இடங்களிலும் நடப்பது தான்
 என்கிறீர்களா..?
அப்படித்தான் நினைக்கிறேன் நானும்.
ஆனாலும் என்னவொ நெருடலாகவும்
குற்ற உணர்வாகவும் இருக்கிறது.
அவனுடனும் அவளுடனும் சேர்ந்து வந்திருந்த
 அவர்களின் மகனைப் பார்க்கும்போது. 

Saturday, October 14, 2017

ஆரையடா சொன்னா யடா ..

Starr 061108-9798 Marsilea villosa.jpg

ஆரையடா சொன்னா யடா
ஒரு காலடி நாலிலைப் பந்தலடி
அது என்னடீ..
என்று ஒளவையை "டீ"  போட்டு  அழைத்தானாம்
  கவி சக்கரவர்த்தி என்று போற்றப்படும் கம்பன்.
அவன் அகங்காரத்தை  தன் கவிதைமொழியால்
அடக்கியவள் ஒளவைப் பெருமாட்டி என்பது
 வாய்வழியாக வரும் பழங்கதை.
எங்கள் ஊரில் வயக்காட்டில் ஆரங்கீரை வரப்போரத்தில்
வளர்ந்திருக்கும் . பள்ளிக்கூடத்திற்குப் போகாத எங்க ஊரு
பெரிசுகள் கூட காதில் பாம்படம் ஆட
தங்கள் மூதாட்டி ஒளவையின் பெருமையை
ஆரங்கீரையில் கண்டு அதை என்னிடம் சொன்னது
 இன்று பழங்கதையாகிவிட்டது.
இன்று வயல்களுமில்லை, வரப்புகளுமில்லை,
 ஆரங்கீரைகளும் காணாமல் போய்விட்டன.
ஒளவைகள் கூட  இதை எல்லாம் மறந்து
 பல காலமாகிவிட்டது.

ஆரங்கீரையை ஆரக்கீரை  என்றும் சொல்கிறார்கள் .
ஆங்கிலப் பெயர்: water clover
பொதுவாக நான்கு இலைகளுடன் நீரின்மேல் மிதந்துகொண்டிருக்கும்
மழையின்றி  காய்ந்து போனாலும் பின்னர் மழைக்காலங்களில்
 மீண்டும் உயிர்பெற்று 100 ஆண்டுகள் வரை வாழும் ..

ஒளவையின் பாடல்:
எட்டேகால் லட்சணமே எமனேறும் பரியே
மட்டில் பெரியம்மை வாகனமே - முட்டமேற்
கூரையில்லா வீடே  குலராமன் தூதுவனே
ஆரையடா சொன்னா யடா

தெருச்சண்டையில் ஏசுகின்ற சொற்கள்
அவலட்சணமானவனே, எருமையே,
கழுதையே, குட்டிச்சுவரே, ஏ குரங்கே..
என்று ஏசிவிட்டு.. ஆரைப் பார்த்துடா உன் விடுகதைக்கு
விடை கேட்கிறாய் என்று சிலேடையில்
 ஆரங்கீரை என்ற பதிலையும்  சேர்த்து சொன்னவள்
ஓளவை.
இதில் அவலட்சணம் என்ற பொருள் தரும்
"எட்டேகால் லட்சணமே"..
அன்றைய பெண்ணின் கணித  அறிவு.
தமிழில் எட்டு என்பதை ‘அ’ என்றும்
 கால் என்பதை ‘வ’ என்றும் குறிப்பார்கள்.
 எனவே, எட்டேகால் லட்சணம் என்றால்
அவலட்சணம் என்று ..!!
அடேங்கப்பா..
ஆரையடா சொன்னா யடா

Tuesday, October 10, 2017

சசிகலாவைக் கண்டு யாருக்கு அச்சம்?

சசிகலாவைக் கண்டு யாருக்கு அச்சம்?
"தொடர் குண்டு வெடிப்பு வழக்கில் குற்றம் சாட்டப்பட்டவரை
 விட ஆபத்தானவர் அல்ல சசிகலா"
சசிகலா குற்றவாளியா இல்லையா
நல்லவரா கெட்டவரா
மறைந்த "ஜெ"வின் மரணத்திற்கும் அவருக்கும்
 உள்ள தொடர்பு என்ன?
இப்படி எழும் கேள்விகளுக்கு நடுவில் இன்னொரு
 மிக முக்கியமான கேள்வியை தமிழக ஊடகமோ 
மனித உரிமை குறித்து பேசுபவர்களோ
எழுப்பாமலிருப்பது எனக்கு வியப்பாக இருக்கிறது.
1993ல் மும்பையில் நடந்த தொடர் வெடிகுண்டு வழக்கில்
 கைதானவர் பாலிவுட் நடிகர் சஞ்சய் தத் 
அவருடைய வீட்டில் துப்பாக்கிகள் இருந்தது
 என்று கண்டுபிடிக்கப்பட்டு உறுதி செய்யப்பட்டதால் அவருக்கு
5 ஆண்டுகள் தண்டனை விதிக்கப்பட்டது.
தற்போது கூட தன் மகளின் நாசி அறுவைச்சிகிச்சையை 
முன்னிட்டு சிறையிலிருந்து
காப்பு விடுப்பில் (பரோலில்) வெ ளியில் வந்துவிட்டார்.
 இப்படியாக கடந்த 2 ஆண்டுகளில் அவர் வெளியில் இருந்தது மட்டும்
 5 மாதங்களுக்கும் மேலிருக்கும்.
ஆனால் சஞ்சய் தத் போல ஒரு குற்றவாளி அல்ல சசிகலா.
சசிகலா வின் குற்றப்பின்னணி பொருளாதரம் ஊழல்
 சார்ந்த குற்றமும் அதற்கு உடந்தையாக இருந்ததும்.
 இன்னும் விளக்கமாக சொல்ல வேண்டும்
என்றால் தொடர் குண்டு வெடிப்பு வழக்கில் குற்றம் 
சாட்டப்பட்டவரை விட ஆபத்தானவர் அல்ல சசிகலா. 
ஆனால் ஏன் சசிகலா வின் காப்பு விடுப்பில்
இத்துணை கட்டுப்பாடுகள்? 
சசிகலா வெளியில் வருவதும் வெளியில் இருப்பதும்
யாருக்கு ஆபத்து? 
எந்த அதிகாரத்தின் கோட்டைக்கு அவர் வெளியில் இருப்பது
ஒவ்வாமையை ஏற்படுத்துகிறது?. 
இந்த ஒற்றைப்புள்ளியில் சசிகலா வின்
பரோல் விடுப்பு பற்றியும் அதிலிருக்கும் அரசியல்,
 மாநில அரசியல், மாநில அரசியலைக்
காவு வாங்கும் மத்திய அரசும் அரசியலும் பேசப்பட்டிருக்க வேண்டும்.
 ஆனால்
அதைப் பற்றி பேசாமல் அதிலிருக்கும் மாநில மத்திய அரசியலைப் பேசாமல் என்னவெல்லாமோ பேசிக்கொண்டிருக்கிறோம்.
இப்பதிவு சசிகலா என்ற தனிப்பட்ட அரசியல்வாதிக்கான 
ஆதரவு பதிவு அல்ல, (அது என் நோக்கமும் அல்ல. ) 
அதையும் தாண்டி, நாம் பார்க்க வேண்டிய மாநில மத்திய
 அரசியல் சதுரங்கம் ஆட்டம். இந்திய இறையாண்மை, மாநில
இறையாண்மை. இந்தியக் கூட்டாட்சி, மாநில சுயாட்சி

Saturday, October 7, 2017

அடைந்தால் திராவிடநாடு, இல்லையேல் சுடுகாடு

கருத்துகளைத் தெரிந்து கொள்வது முதல் நிலை.
அடுத்தது தெரிந்ததைப் புரிந்து கொள்வது.
புரிந்தப் பின் ஏற்றுக்கொள்வதும் கடந்துசெல்வதும்.
ஆனால் வாழ்க்கையில் பெரும்பகுதி
 புரிந்து கொள்வதிலேயே கழிகிறது.

அறிந்து கொண்டதும் புரிந்து கொ ண்டதும் 
காலப்போக்கில் அர்த்தமிழந்துவிடுகின்றன.
"அடைந்தால் திராவிடநாடு இல்லையேல் சுடுகாடு "
இப்படி அறிந்து கொண்டதும் புரிந்து கொண்டதும்
இன்று என்னவாக இருக்கிறது ?!!
இந்த முழக்கம் "ஒரு பயங்கரமான அரசியல் மோசடி"
 என்று திரு. சம்பத் அவர்கள் அன்று  சொன்னபோது
அவரைத் துரோகியாக நினைத்ததும் ஒதுக்கியதும்
 நினைவுக்கு வருகிறது.

தமிழ்நாட்டை விட  சிறிய நாடுகள் எல்லாம்
 இன்று சுதந்திரம் பெற்ற தனிநாடாக இருக்கும் போது
 தனித்தமிழ் நாடு ஏன் சாத்தியப்படாது?
 என்று இன்றைய தமிழ்த்தேசியம் கேட்கிறபோது
அந்தக் கருத்தியல் ரீதியான விளக்கத்தில்
அப்படியே உணர்ச்சிப் பொங்க
 நாடி நரம்பெல்லாம் புடைத்து வீங்கி வெடித்து..
மேடை அதிர கை தட்டல் ..
 பேசியவருக்கும் கேட்டவருக்கும் மகிழ்ச்சி. மகிழ்ச்சி.
தமிழ்தேசியம் வாழ்க வளர்க ..
தமிழினப்பற்றை  உறுதி செய்துவிட்ட பெருமிதத்தில்
அன்றைய தினம் .
ஆனால் அம்மாதிரியான தருணங்களில் எல்லாம்
என் நினைவுக்கு வந்து தொலைக்கிறது இந்த வசனம்
"அடைந்தால் திராவிடநாடு. இல்லையேல் சுடுகாடு"



Sunday, October 1, 2017

காந்தியும் மும்பைத் தமிழர்களும்

Image result for gandhi at manibhavan

தேசியம் இல்லாத தேசம்  எங்கள் இந்தியத் தேசம்.
கனக-விசயனின் தலையில் கல்சுமக்க வைத்தது எங்கள்  கடந்தகாலசரித்திரம்
கார்க்கில் போரில் வீரமரணம் இன்றைய  வரலாறு.
இந்திய தேசம் என்பது இமயமுதல் குமரி வரை என்பது
பூகோளம் அறியாதவர்கள் எழுதிவைத்தது.
குமரி முதல் இமயம் வரை என்பது ,மனித இன வரலாறு.
இப்படி புரளும்   வரலாற்றின் அலைகளில்
 காந்தியம் என்ற பேரலை வீசிய போதும்
 நாங்கள் அடித்துச் செல்ல முடியாத
அழிக்க முடியாத எழுத்துகளை எழுதியிருக்கின்றோம்.
எங்களிடம் தான்  காந்தியத்தின் சத்தியாகிரகத்தின்
உப்பின் வேர்வை  கரைந்திருக்கின்றது.
அந்தக் கரைசல் வெறும் பெளதிகக் கரைசல் அல்ல,
சத்திய சோதனையை அக்னி சோதனைக்கு உள்ளாக்காத நம்பிக்கை.
அந்த நம்பிக்கை பலரின் வாழ்க்கையானது.
இந்த அரபிக்கடலோரம் இந்திய வரலாற்றில்
 எத்தனையோ பக்கங்களை  எழுதி இருக்கிறது.
அதில் காந்தியும் எழுத மறந்த சிலப் பக்கங்கள் உண்டு.
இவை எங்களைப் போன்ற சாமனியமானவர்களின் பக்கங்கள்.
எங்களுக்கு முகவர்கள் இல்லை. முகவரிக் கூட இல்லை.
அதனால்தான் எங்கள் வாழ்க்கையின் உன்னதங்களைப்
 பதிவு செய்பவர்கள் இல்லை.
எழுதத் தெரியாத மக்கள் எத்தனையோ
எழுதமுடியாதச் சரித்திரங்களை தன் வாழ்க்கையில் எழுதினார்கள்.
இன்று-
அந்தச் சரித்திரத்தின் எச்சமாக நிற்பவை சிலரின் பெயர்கள்.
அந்தப் பெயர்கள் மட்டுமே கடலோரம் இருக்கும் கல்வெட்டுகள்.
**
காந்தி, பகவத்சிங், திலக், பாரதி  இதெல்லாம்தான் அவர்கள் தங்கள் குழந்தைகளுக்கு வைத்தப் பெயர்கள்.
அட... காந்தி என்பது தனி நபரின் பெயரல்ல..
அது ஒரு குடும்பத்தின் பெயர். (SURNAME)
இதை எடுத்துச் சொன்னபோது அதனாலென்ன..,
அடுத்தக் குழந்தைக்கு காந்தியின் பெயரை
வைத்து விடுகின்றேன் .."மோகன்" என்று..
இப்படி பெயர் வைத்துக் கொண்டு வாழ்ந்தார்கள்.
அவர்களில் ஒருவர் , காந்தி என்ற பெயர்சூட்டப்பட்டவர்
 இன்று பத்தமடை காந்திநகரில் சீரும் சிறப்புமாக
வாழ்ந்து கொ ண்டிருக்கிறார்.
பகவத்சிங், மோகன் என்ற பெயர் சூட்டப்பட்ட அந்தக் காந்தியவாதியின் மகன்கள் இன்று இல்லை.
இன்னொரு  சுவராஷ்யமான செய்தி ..( நினைவில் வாழும் சீர்வரிசை சண்முகராசன் மூலமாக நானறிந்த சம்பவம் )
அவர்களில் ஒருவர்... தொழிலாளி..
தனக்குப் பிறந்தப் பெண்குழந்தையை...
இரண்டு மாதம்கூட ஆகாத தன் குழந்தையை எடுத்துக்
கொண்டு மும்பையிலிருக்கும் மணிபவன் வாசலில்
 காலையிலிருந்து காத்திருக்கின்றார்...
கூட்டம்.. அலைமோதுகிறது...
அந்தக் காந்தியப் பேரலையில் நனைய வந்திருக்கும்
பச்சிளங்குழந்தை அழுகிறது..
வெயில் தாங்காமல்.. கூட்ட நெரிசலில்..பசித்து..

"வேண்டாம் நமக்கு இந்த அலையின் ஈரம்..
இந்த அகிம்சை விடுதலையில் நம் அடிமைத்தளை 
உடையப் போவதில்லை.
தலைவர்களுக்காக  நீங்கள் ரத்தம் சிந்தியது போதும்
என் கண்களையும் கட்டி விடாதீர்கள்
நான் எனக்கான விடுதலையைப் போராடியே 
பெறுவதற்குப் பிறந்துவிட்டேன்
வேண்டாம் எந்த மகாத்மாவும் ..
எனக்குத் தேவை மனிதர்கள் மட்டும்தாம்..!."

அழுதது அழுதது....
இன்னும் அழுதுக் கொண்டே இருக்கிறது.
ஆனால் கேட்காதச் செவிகள்..
அப்படித்தான் அந்தக் குழந்தையுடன் அவரும் ...
அந்தக் குழந்தையின் அழுகுரல்..
காந்தியின் கூடாரத்தில் முட்டி மோதி
அவர் மெளனத்தைக் கலைத்துவிட்டதா ?
பின் எப்படி நிகழ்ந்தது அந்த நிகழ்வு..!
காந்தியின் உதவியாளர்  வெளியில் வந்தார்.
அழுகின்ற குழந்தையைக் கையில் ஏந்தி நிற்கும் செல்லையாவிடம்.

செல்லையா கண்களில் நீர்மல்க...
எங்கள் காந்தி-
என் குழந்தைக்குப் பெயர் வைக்க வேண்டும் என்ற வேண்டுதலுடன்...!
கண்ணப்பனுக்கு காட்சியளித்த  சிவனின்கதை வெறும் புராணம்..
இந்தச் செல்லையாவுக்கு அன்று காந்தி கொடுத்தது?
செல்லையாக்களின் வாழ்க்கையில் அதுவே வரம்..
காந்தி அவர்களுக்குக் கொடுத்த வரம்.

செல்லையாவின் பெண்மகவுக்கு காந்தி வைத்தப் பெயர் கஸ்தூரி..
ஆம் கஸ்தூரி...
அவருடைய வாழ்வின் துணை, காந்தியின் சரிபாதி..
கஸ்தூரியைக் கையில் ஏந்திக் கொண்டு செல்லையா கடலோரம் நின்றபோது..
காந்தி என்ற சரித்திரத்திற்கு தலை வணங்காதக் கடல் அலைகள்
செல்லையா என்ற உழைப்பாளியின் நம்பிக்கைக்கு முன்னால் தலைவணங்கியது.

இந்தச் செல்லையா அவர்கள் தமிழ்நாட்டில்
 கோவில்பட்டி வட்டாரத்தைச் சார்ந்தவர்,
வேதமுத்து என்ற தமிழ்ப்பண்டிதரின் இளவல்.
இன்று காந்தியின் கஸ்தூரி.. நெல்லை மாவட்டத்திலிருக்கும் சேரன்மகாதேவியில் தன் பேரன் பேத்திகளுடன் வாழ்ந்து கொண்டிருக்கின்றார்.
செல்லையா இன்று இல்லை...
யாருக்குத் தெரியும்... எத்தனை பேருக்குத் தெரியும்...
தன் இரண்டு மாத அழுகுரலில் காந்தியை எழுப்பிய
 கஸ்தூரி இவர் என்பது...
பெரும் தலைவர்கள் தேர்தல் பிரச்சாரத்திற்கு வரும்போது தன் குழந்தைகளுக்குப் பெயர் வைத்து அதையே
 பெரியப் புகைப்படம் எடுத்து நடு அறையில்
 மாட்டி வைத்துக் கொண்டு வாழ்கின்ற
இன்றைய விளம்பரங்கள் அறியாத
செல்லையாக்கள் எத்தனை எத்தனையோ பேர்..

காந்தியின்  தேசிய நீரோடையில் தன் சுயம் இழக்காமல்
 வாழ்ந்த தமிழர்களும் உண்டு.
அவர்களுக்கெல்லாம் மகாத்மா பூலே தலைவராக இருந்தார்.
சமூகவிடுதலை இல்லாத அரசியல் விடுதலை... சாத்தியமில்லை
என்ற கருத்தை முன்வைத்து தங்கள் இருத்தலுக்காகப்
போராடியவர்கள். அவர்களின் ஒருவரான
நரசிம்மமேஸ்திரி அவர்கள் தான் முதன் முதலாக
தாராவியின் தமிழ் தொழிலாளர்களின் குழந்தைகள்
 கல்வி கற்பதற்காக முதல் தமிழ்ப் பள்ளிக்
கூடத்தை நிறுவினார். தமிழ்நாட்டிலிருந்து கல்வி கற்பிக்க
 ஆசிரியர்களை அழைத்து வந்தார்.
இசுலாமியர்களுடன் இணக்கமான சகோதரத்துவ
 உறவைப் பேணி வந்தார்.
இந்த எச்சங்கள் தான் இன்றும் தாராவியில்
 காணப்படும் தமிழர்களின் வாழ்க்கை.
காந்தி அலையும் எதிரலையும்
 ஒன்றுடன் ஒன்று கலக்காமல், மோதிக் கொள்ளாமல்
அரபிக்கடலோரம் .. வாழ்ந்த வாழ்க்கை..
 மும்பைத் தமிழர் வாழ்க்கையில்
முக்கியமான  பக்கங்கள்.



Wednesday, September 27, 2017

அஸ்தினாபுரம் - ஜோ டி குருஸ்

Image result for அஸ்தினாபுரம் நாவல்

ஒரு நாவலும் கதை மாந்தர்களும் ஒன்றுடன் ஒன்றாகக் கலந்திருப்பார்கள்.
அந்த குறிப்பிட்ட நாவலில் அக்கதை மாந்தர் இல்லை என்றால் அந்த நாவல் இல்லை., கதையின் ஜீவனாக அக்கதை மாந்தர்களே இருப்பார்கள். ஒருவகையில் அக்கதை மாந்தர்களைச் சுற்றியே கதைக்களமும் கதையும் நிகழ்வுகளும் பின்னிப் பிணைந்திருக்கும்.
காலமும் களமும் அக்கதை மாந்தரின் ஜீவனுக்கு உயிரூட்டும் ரத்தமும் சதையுமாக கதையுடன் கலந்திருக்கும். இப்படியான கதைகளைத் தொடர்ந்து வாசித்திருக்கிறேன்.
ஆனால் இப்புரிதல்களைத் தாண்டி அண்மையில்
இன்னொரு தளத்திற்கு என்னை அழைத்துச் சென்றதில்
 அஸ்தினாபுரத்தின் ஜோ டி குருஸ் மிக முக்கியமானவர்.
குருஸ் அவர்களின் மூன்றாவது நாவல்.

 இத்தலைப்புக்கும் நாவலுக்கும் எதாவது
நேரடி தொடர்பு இருக்கிறதா என்று கவனித்தால்
அப்படி வெளிப்படையாக எதுவும் தென்படவில்லை,
ஆனால் ஒட்டுமொத்த வாசிப்புக்குப் பிறகும் கடலோடி சமூகமும்
அவர்களின் வாழ்வும் அஸ்தினாபுரமாக விரிகிறது.
 அவர்கள் தன் கவசக்குண்டலத்தையும்
தானமாகக் கொடுக்கும் கர்ணனின் எச்சமாக வாழ்க்கையை தானமாகக் கொடுத்துவிட்டு கடலலையில் மிதந்து தவிக்கிறார்கள்.

எந்த ஒரு கதைப்பாத்திரத்தின் கம்பீரமோ நெகிழ்வோ
 கட்டமைப்போ இல்லை.
கடல் சார் வாழ்க்கையின் அடுத்த நகர்வாக இருக்கும்
 "கார்கோ" ஏற்றுமதி இறக்குமதி
துறைமுக வாழ்க்கையின் ஒவ்வொரு அம்சமும்
கதைப்பாத்திரமாக கம்பீரமாக கதையில் நடமாடும்
மனிதர்களையும் கடந்த ஜீவனாக கடலலையில் மிதக்கிறது.
லோட் ஏற்றும் கனரக லாரிகளும் லாரி ஓட்டுநர்களும்
 பாலங்களும் அவை சார்ந்த அறிவும் தெளிவும் .. 
என்று வாசகன் அறியாத சில பக்கங்களில்
வெளிச்சத்தைப் பீச்சுகிறது அஸ்தினாபுரத்தின் கண்டெய்னர்கள்.

கிரனெட் ஏற்றுமதி இறக்குமதியிலும் சரி, ராட்சத
காற்றாடிகளின் கப்பலில் ஏற்றுவதிலும் சரி ஏற்படும்
 உள்நாட்டு வெளிநாட்டுப் பிரச்சனைகள் வரை கதை அலசுகிறது.
Non-fiction தரவுகளை வைத்துக்கொண்டு எழுதப்பட்ட நாவல்
 ஆங்காங்கே எழுத்தாளரின் சுய அனுபவங்கள் துணுக்குகளாக 
ஒட்டியும் ஒட்டாமலும் கலந்திருக்கின்றன. எடுத்தவுடன் வாசித்துவிட்டுத்தான் புத்தகத்தைக் கீழே வைக்க
வேண்டும் என்ற பதட்டத்தை அஸ்தினாபுரம் தரவில்லை.
 சில பக்கங்களைப் புரட்டி விட்டு போகலாம்.
 சில பக்கங்களை விட்டு விடலாம்.
எப்படி விருப்பமோ  அப்படி வாசிக்கலாம்!
கார்கோவில் கருவாடு தான் மணக்க வேண்டும் என்பதில்லையே.
கிரனெட் கற்களும் ஏறத்தான் செய்கின்றன  யோ யோ கிரேன்களின்
இணைப்பு உதவியுடன்.

Saturday, September 23, 2017

உன்னால் முடியும் தம்பி ..ஒரிஜினலும் சினிமாவும்

உன்னால் முடியும் தம்பி தம்பி..
Image result for எம் எஸ் உதயமூர்த்தி
எம்.எஸ். உதயமூர்த்தியின் தாரகமந்திரம்.
தன்முனைப்பு கருத்துகளை உள்ளடக்கிய
அவருடைய கட்டுரைகள் தொடராக வார இதழ்களில் வெளிவந்தன.
இவர் எழுதிய "எண்ணங்கள் " என்ற புத்தகம்
அந்தக் காலத்திலேயே 10 இலட்சம் பிரதிகள்
விற்றது  என்றால் பார்த்துக் கொள்ளுங்களேன்!
இவர் கருத்துகளுக்கு அக்காலத்தில்
இளைஞர்களிடம் பெரும் வரவேற்பு இருந்தது.
 நதிகளின் இணைப்பு என்ற குரல் பொதுஜன ஊடகத்தில்
பரவலாக பேசப்பட்டதற்கு  முக்கியமான காரணமாக இருந்தார்.
அரசியல் சாக்கடை அல்ல, நல்லவர்கள் ஒதுங்கி இருப்பதால்
 ஏற்பட்ட அவலம் தான் இன்றைய கேடுகெட்ட அரசியலுக்கு
காரணம் என்று இளைஞர்களிடம் எடுத்துரைத்தார்.
" மக்கள் சக்தி " என்ற இயக்கம் கண்டார்.
மதுரை மத்திய தொகுதியில் தன் இயக்கம் சார்பாக
தேர்தலில் நின்றார். தன் தேர்தல் பிரச்சாரத்தில்
"என்னிடம் நிறைய பணம் இருக்கிறது
ஆகவே மக்கள் பணத்தை தொடமாட்டேன்,
என்னிடம் உள்ள ஆற்றலை, அறிவை உங்களுக்கு
 செலவிட சட்டமன்ற உறுப்பினர் என்ற அதிகாரம் தேவை.
 என்னைத் தேர்ந்து எடுப்பதன் மூலம் ஒரு நேர்மையாளனை
 தேர்ந்து எடுக்கிறீர்கள், என்னை தேர்ந்து எடுப்பதன் மூலம்
 நதிகளை தேசியமயமாக்கவேண்டும் என்ற குரலை
 வலுப்படுத்துகிறீர்கள், என்னை தேர்ந்து எடுப்பதன் மூலம்
 இந்த நாட்டிற்கு நல்ல பல இளைஞர்களை வருவதற்கான
 பாதையை அமைத்து தருகிறீர்கள்" என்று பேசினார்.
வழக்கம் போல நம் வாக்காளர் பெருமக்கள்
அவரைத் தோற்கடித்தார்கள்.
தமிழக அரசியல் தலைவர்களான அறிஞர் அண்ணா,
கலைஞர், எம்ஜிஆர் ஆகியோருடன்
இணக்கமான தொடர்பை வைத்திருந்தார்.
------
என் திடீர்னு எம் எஸ் உதயமூர்த்தி ?
நினைவுக்கு வந்திட்டாருனு கேட்காதீர்கள்.
பெரிசா ஒன்னுமில்ல. நேற்று ராஜ் டிவியில்
கமலஹாசன் உதயமூர்த்தி என்ற பெயரில்
நடித்த பாலசந்தரின்  "உன்னால் முடியும் தம்பி" திரைப்படம் ஓடிக்கொண்டிருந்தது. எப்படியோரிமோட் அதில்
மாட்டிக்கொண்டதால் உதயமூர்த்தி நினைவுக்கு வந்துவிட்டார்.
இப்போ இருக்கிற நிலையில கமலின்
 "உன்னால் முடியும் தம்பி" திரைப்படத்தைக் காட்டுவது
 ஏதேச்சையாக நடந்ததா.. இல்ல ..
வேறு எதுவும் காரணத்தோட நடக்குதா..!
ரஜினி அரசியல் பிரவேசத்தைக் கொண்டாடிய மக்களுக்கும்
கமலின் அரசியல் டுவிட்டர்களைக் கொண்டாடும் கூட்டத்திற்கும்
 நிறைய வேறுபாடு இருக்கிறது  என்பது அடிக்கடி
என் நினைவில் வருகிறது. தவிர்க்க முடியவில்லை.


அண்ணாவின் தம்பிகள்
கலைஞரின் உடன்பிறப்பே
எம்ஜிஆரின் ரத்தத்தின் ரத்தங்களே
இதே வரிசையில் போகிறதா..
உன்னால் முடியும் தம்பி, தம்பி...
கருப்புக்குள் காவியும் அடக்கம் என்று
விளக்கெண்ணெய் அரசியல் பேசும்
உலகநாயகனுக்கு ஊடகங்கள் ஏன் வெண்சாமரம் வீசுகின்றன!?

Wednesday, September 20, 2017

தேவியும் காமட்டிபுரமும்

Image result for navratri durga paintings

காமட்டிபுரத்தின் கதவுகள் திறந்துவிட்டன.
நவகன்னியர்கள் வெளிச்சத்திற்கு வருகிறார்கள்
தேவியின் சிலைகள் கொட்டும் மழையில்
ஊர்வலமாய் எடுத்துச் செல்லப்படுகின்றன
ஆடை அலங்காரங்களுடன் பவனிவரும் அவள்
 கருப்பை மண்ணில் காமட்டிபுரத்தின்
 இரவுகள் விழித்திருக்கின்றன.
நிர்வாணமாய் விரியும் அவள் படுக்கை அறையிலிருந்து
எட்டிப் பார்க்கிறது தேவியின் சூலம்.
காமாட்டிபுர அழகிகளின் கைப்பிடி மண்ணுக்காக
விரதங்களுடன் கழிகிறது உங்கள் நாட்கள்.
தேவி அங்கிருந்துதான் புறப்படுகிறாள்.
தேவி , அங்கிருந்துதான் புறப்படுகிறாள்.
-----
நவராத்திரி தேவியின் சிலைகள் செய்வதற்கு பிடிமண்
 காமாட்டிபுரத்தைப் போல சிவப்புவிளக்கு பகுதியில் வாழ்ந்து கொண்டிருக்கும் பாலியல் தொழிலாளர்களிடமிருந்து
பெறப்படுகிறது என்ற செய்தியை முதன் முதலில்
 இந்தி திரைப்படங்கள் மூலமாக அறிந்து
அதன் பின் அது குறித்த தேடலில் பல்வேறு சுவையான
 தகவல்களை நம் அன்னையர் சமூகத்தின்
வாழ்வியல் எச்சங்களைக் கண்டடைந்தேன்.

நம் சமூகத்தில் அன்னை மட்டுமே தலைமைப் பொறுப்பில்
இருந்தக் காலத்தில்,  வேட்டைச் சமூகத்தில் ஏற்பட்ட உயிரழப்புகளை ஈடு செய்யும் சக்தியாக பெண் மட்டுமே பார்க்கப்பட்ட காலத்தில்
அவள் வழிபாட்டுகுரியவள். சக்தி பீடம் அவள்.
குழந்தைப் பேறுக்கு அவள் மட்டும் பொறுப்பல்ல
 என்ற ஏதோ ஒரு புரிதலில் ஆண் வேட்டைச்சமூகத்தின்
 தலைவனாகிறான். அந்த ஆதிக்கத்தை ஏற்றுக்கொள்ளாத
 பெண்கள் விலகி நின்றதும் விலக்கப்பட்டதும் நடந்தது. அப்படி விலக்கப்பட்டவர்களில் ஆடல் பாடல் கலைகளில் வல்லவர்களான பெண்கள்  தனித்து நின்றார்கள். இப்படித்தான் தேவதாசிகள்
உருவானர்கள். அதன் பின் அதுவே பிறப்பின் வழி அடையாளமாகி மணிமேகலைகள் உருவான  கதை நிகழ்ந்தது. அந்தப் பெண்களின் தலைமைத்துவ கலாச்சாரத்தின் எச்சமாகத்தான்
அவள் கைப்பிடி மண்ணில் தேவி வலம் வருகிறாள்.
 இதைத்தான் வங்க மொழியில்
"ஒதுக்கி வைக்கப்பட்ட பிரதேசத்தின் புண்ணிய மண்" என்று சொல்லுகிறார்கள்.
(The soil is known as ‘punya mati’ and the place where a prostitute resides is known as ‘nishiddho pallis’ in Bengali meaning forbidden territories.)

இன்னொரு சாரார், பாலியல் தொழில் செய்யும் பெண் வீட்டுக் கதவைத் தட்டும் போது அந்த ஆண்களின் புண்ணியங்கள் எல்லாம் அவள் வீட்டு வாசலில் விடைபெறுகின்றன.!
அதனால் தான் அவளிடம் மன்னிப்பு கேட்கும் வகையில்
அவளிடம் கைநீட்டி கைப்பிடி மண்ணை பிச்சையாகக்
கேட்கிறார்களாம் ஆண்கள்! இந்த ஆண்களின்
புண்ணியக்கதையில் ஆணாதிக்கத்தின் இன்னொரு முகம்தான்
 புனைவாக மாறி இருக்கிறது.

நவராத்திரியில் ஒன்பது வகையான கன்னிப்பெண்களை வழிபடுவது என்பதற்கும் சில காரணங்கள் சொல்லப்படுகின்றன.
நடனமங்கை, மண்டை ஓட்டை வழிபடும் தாந்திரிகி, பாலியல்தொழிலாளி, துணி வெளுப்பவள், சிகை அலங்காரம் செய்பவள், பிராமணப்பெண், சூத்திரப்பெண், யாதவகுலப் பெண், தோட்டவேலை செய்பவள்... இந்த  நவகன்னியர்களை வழிபாடு செய்தால் தான்
துர்க்காபூஜை  நிறைவுப் பெறும். இந்த வழக்கமே இன்று 9 கன்னிப்பெண்களை
வழிபடுவதாக மாறி இருக்கிறது.
națī kapālikā veśyā rajakī nāpitāńganā | brāhmaņī śudrakańyā ca tathā gopālakańyakā || mālākārasya kańyā ca nava kańyā prakīrtitā ||"(Guptasadhana Tantra 1:12)

வடநாட்டில் கொண்டாடப்படும் துர்க்காவும்
தமிழ்நாட்டின் கொற்றவையும்
வேறு வேறு பிரதேசங்களிலிருந்து புறப்பட்டு
 "சக்திவழிபாடு" என்ற ஒற்றைப் புள்ளியில் கலந்தவை
என்பது இன்னொரு தனி வரலாறு. (இது குறித்த ஓர் ஆய்வுக்கட்டுரை
சில ஆண்டுகளுக்கு முன்  புதுவிசை இதழில் வெளிவந்ததிருந்தது. )

தமிழ் நாட்டில் 99% அம்மன் கோவில்கள் வடக்கு நோக்கி
அமர்ந்த்திருக்கிறது என்றும் அதன் காரணத்தையும் விளக்குகிறார் தொ.பரமசிவம் அவர்கள்.   பழைய தமிழகம் எனபது கேரளத்தையும்
 சேர்த்து அமைந்தது. நம் மண்ணைச் சுற்றி மூன்று பக்கமும் கடலால் சூழ்ப்பட்டது. ஆபத்து என்று ஒன்று வந்தால் அது வடக்கு இருந்துதான் வரவேண்டும். தெய்வம் வடக்கு  திசை நோக்கி தன் மக்களை காக்க
 ஆயுதம் ஏந்தி நிற்கின்றது என்பது தொல்வரலாற்று உண்மை என்கிறார்.
பொதுவாக அம்மன் போன்ற தாய்தெய்வ வழிப்பாடுகளில் பிராமணர்கள் அல்லாத பிற சாதியினரே பூசாரியாக உள்ளனர்.
உலகம்மன், முத்தாரம்மன், மாசானி அம்மன், லோக நாயகி
 என வட்டாத்திற்கு வட்டாரம் தெய்வங்கள் மாறுபடும்.
இருந்தாலும் தாய்த்தெய்வத்திற்கு தனித்தன்மைகள் உண்டு.
 வடக்கு நோக்கி அமர்ந்திருத்தல், கையில் ஆயுதம் ஏந்தியிருத்தல்,
 பெரிய பொட்டு, மிரட்டும் விழி. வழிப்பாட்டு முறையில் பொங்கலும், முளைப்பாரியும், சாமியாடலும், இரத்தப்பலியும்
 இவற்றின் தனிக்கூறுகளாகும்.
காவல் தெய்வமாக இருந்த தாய்வழிபாடு
 போர்த்தெய்வ வழிபாடாக மாற்றம் பெறுவதை
 கலிங்கத்துப் பரணியில் காணலாம். ..

தேவியர் இங்கிருந்து தான் புறப்படுகிறார்கள்.
பெண்ணியத்தின் உடல்மொழி நவராத்திரியின் சடங்குகளுக்குள் புதைக்கபப்ட்டுவிட்டது.