Saturday, November 20, 2021

ஜெய்பீம் கொண்டாடு.. பெயரில் என்ன இருக்கிறது?

 பெயரில் என்ன இருக்கிறது?

தோழா.....
பெயரில் என்ன இருக்கிறது?
எல்லா பெயர்களும்
எல்லோருக்கும் பொருந்துவதில்லை.
பெயரில் என்ன இருக்கிறது?
திருப்பதி மொட்டையும்
திருச்செந்தூர் மொட்டையும்
ஒன்றா.. ?
மயிரு தானே!
பெயரில் என்ன இருக்கிறது?
மீனாட்சி காமாட்சி விசாலாட்சி
மாரியம்மா எல்லம்மா முண்டகண்ணி
கும்பிடும் தெய்வம்
குலசாமி
கழுத்தில் தொங்கும் தாலி
கருமாதி வீடு
எல்லாமும் ஒன்றுதான்.
பெயரில் என்ன இருக்கிறது?
தோழா பெயரில் என்ன இருககிறது!
தாலியைப் பார்த்து
சாதியை அறியலாம்.
தோழா நீயோ
தாலி அறுத்து திருமணம்
நடத்துகிறாய்.!
புரட்சி வெடிக்கிறது..
பெயரில் என்ன இருக்கிறது?
தோழா.. பெயரில் என்ன இருக்கிறது!
யாருக்கும் தெரியாத சாதி
சாவு வீட்டில்
மீண்டும் பிறக்கிறது.
போகிற இடத்திற்கு
புண்ணியம் தேட
எல்லாமும் தான்
உனக்கும் எனக்கும்.
பெயரில் என்ன இருக்கிறது?
தோழா..பெயரில் என்ன இருக்கிறது!
ஜெய்பீம் கொண்டாடு.
புரட்சி வெடிக்கும்
ஜீவா , பாரதி
காந்தி பகத்சிங்
உன் புரட்சிக்குரல்
எல்லைகள் தாண்டி
இலெனின் ஸ்டாலின்
சேகுவேரா வரை
அட டா..
உன் புரட்சியின் திருநாம வரிசையில்
புதைந்திருக்கிறது
தோழா..
உன் புரட்சியின் அசல்முகம்.
பெயர்கள் உனக்கு
புரட்சியின் முகமூடி
கறுப்பு சிவப்பு
எல்லா முகங்களுக்கும்
இதுதானே சொந்தமுகம்.
இன்னும் பிறக்கவில்லை
எவர் வீட்டிலும்
இவர் மட்டும் .
(அம்பேத்கர்)
அட டா..
பெயரில் என்ன இருக்கிறது!
தோழா.. பெயரில் என்ன இருக்கிறது!
ஜெய்பீம் கொண்டாடு.
உன் புரட்சியின் முகம்
ஒளிரட்டும்.
கொண்டாடு.
ஜெய்பீம் கொண்டாடு.
பெயரில் என்ன இருக்கிறது?
உனக்கும் எனக்கும்
பெயரில் என்ன இருக்கிறது?
தோழா ..
பெயரில் என்னதான் இருக்கிறது !!

No comments:

Post a Comment